समाचारहरू

पातारासी गाउँपालिकाले १० औँ हिउँदे गाउँ सभाबाट एमबीबीएस पढ्ने विद्यार्थीलाई छात्रवृत्ति निर्देशिका २०७९ बहुमतले पारित गरेको छ । पालिका भित्रका विद्यार्थीलाई उच्चशिक्षा अध्ययन गर्नका लागि हिउँदे गाउँ सभाबाट छात्रवृत्ति कार्यक्रमको ऐन, नियमावली र निर्देशिका पारित गरेको हो ।

पालिकाको लगानीमा एक जनालाई एबीबीएस डाक्टर पढाउन ३५ लाख रुपियाँ लगानी गर्ने भएको छ । पाँच वर्षसम्म ७ लाख रुपियाँका दरले पालिकाले डाक्टर पढ्ने विद्यार्थीलाई छात्रवृत्ति दिने निर्देशिका पारित गरेको हो ।

पातारासी गाउँपालिकाको उच्चशिक्षा छात्रवृत्ति कार्यक्रम अन्तर्गत चिकित्सा शिक्षाको स्नातक तहमा छात्रवृत्तिमा अहिले सो गाउँपालिका–४ लुमगाउँका २३ वर्षीय नविन रेउले देवदह मेडिकल कजेज बुटवलमा चिकित्सा शिक्षा अध्यनरत छन् । जिल्लाका आठ ओटै स्थानीय तहमध्ये सो गाउँपालिकाले यहाँका विद्यार्थीलाई चिकित्सक बनाउन लगानी गरेको हो । यो कार्यक्रममा ऐन, नियमावली र निर्देशिका सबै गाउँसभाबाट पारित भएर पूर्ण रुपमा कार्यन्वयनमा आएको स्वास्थ्य शाखा प्रमुख रतन बुढ्थापाले बताउनु भयो ।

अघिल्लो जनप्रतिनिधिले ल्याएको एमबीबीएस डाक्टर पढ्ने कार्यक्रमलाई निन्तरता दिएको र प्राविधिक शिक्षामा पनि पालिकाले छात्रवृत्ति प्रदान गरिने गाउँपालिकाका अध्यक्ष पूर्णसिंह बोहोराले बताउनु भयो ।

हिउँदे गाउँसभाबाट पालिकाका सबै वडामा बालविवाह न्यूनीकरणमा हाम्रो प्रतिबद्धता भन्ने मुल नारालाई मध्यनजरगर्दे बालविवाह रोकथामका विभिन्न सचेतना कार्यक्रम चलाइने र पालिकाको वडा नं. ४ र ५ लाई बालमैत्री वडा घोषणागर्ने निर्णय गाउँसभाबाट पारित भएको प्रमुख प्रशासकीय अधिकृत विष्णुप्रसाद धितालले बताउनु भयो ।

पालिका भित्रका सबै स्थानीयवासीको निःशुल्क स्वास्थ्य बीमा गर्ने कार्यक्रम लागु भई कार्यन्वयनमा आएको छ । प्रमुख प्रशासकीय अधिकृत धितालले भन्नुभयो खानेपानी सरसफाई स्वाच्छता तथा अनुगमन निर्देशिका ऐन हिउँदे गाउँसभाबाट पारित भएर कार्यान्वयनमा आएको छ ।

०७९ माघ ९ गते