समाचारहरू

सामाजिक अन्धविश्वासका रूपमा रहेको छाउपडी कूप्रथाका कारण यहाँका महिलाहरू घरमै सुत्केरी हुन बाध्य भएका छन् ।

स्वास्थ्य संस्थाबाट सुत्केरी भएका महिलालाई घरसम्म पुर्‍याउन सवारी चालकहरूले नमान्ने र पुर्‍याएपनि चर्को रकम लिने भएकाले सुत्केरी महिला समस्यामा परेका हुन् ।

जिल्लाको नमूना क्षेत्रमा रहेको साविकको सिद्धेश्वर गाविसमा मात्रै यो आर्थिक वर्षमा आठ जना महिला घरमै सुत्केरी भएको सिद्धेश्वर स्वास्थ्य चौकीका प्रमुख मदन महराले बताए ।

'बुहारी सुत्केरी गराउन स्वास्थ्य संस्था लग्ने बेलामा १ हजार ५ सय गाडीभाडा तिरेर लगेँ । तर, फर्कने बेलामा ४ हजार भन्दा तल ल्याउन मानेनन् ।'-स्थानीय गणेशदत्त भट्टले भने ।

उक्त क्षेत्रका स्थानीयले सुत्केरी महिलाको समस्या समाधानका लागि एम्बुलेन्सको माग गरेका छन् ।

जिल्लाका अन्य ठाँउमा पनि यस्तो समस्या रहेको जिल्ला अस्पताल बैतडीका प्रमुख डा. गुणराज अवस्थीको भनाइ छ । 'अधिकांश क्षेत्रका स्थानीय अझैपनि सुत्केरी भएको बेला आफ्नै पत्नीलाई समेत छुन मान्दैनन् ।'-अवस्थीले भने ।

यस्तै अन्धविश्वासका कारण जिल्लालाई असार मसान्तमा गर्ने भनिएको पुर्ण संस्थागत सुत्केरी घोषणा कार्यक्रम पनि प्रभावित बन्ने देखिएको भन्दै सामाजिक अभियानकर्ताहरूले चिन्ता व्यक्त गरेका छन् ।

नरी बडु