समाचारहरू

महागढीमाई मन्दिर परिसरमा छठी घाट बनाउने विषयलाई लिएर कात्तिक १२ गते बिहान दुई समूह बिच झडप भएको छ ।

झडपमा महागढीमाई नगरपालिका-१ मठवा टोलका ५५ वर्षीय झगरु महतो, सोही ठाउँका ३२ वर्षीय मुकेश कुशवाहा र गढीमाई मन्दिर विकास तथा सञ्चालन समितिका सचिव ४८ वर्षीय मोतिलालप्रसाद घाइते भए ।

घाइते सबैको सामान्य उपचार जिल्ला अस्पताल कलैयामा गरी थप उपचारका लागि नारायणी उपक्षेत्रीय अस्पताल विरगञ्ज पठाइएको जिल्ला प्रहरी कार्यालयका डिएसपी रञ्जितसिंह राठौरले बताए ।

सोही वडाका डिही टोल निवासी सामान्य घाइतेहरू अशोक गोढ, जयनारायण जैसवाल, रामजी महतो, नन्दकिशोर ठाकुर, नरेश मण्डल र रामशिस महतोको जिल्ला अस्पताल कलैयामा उपचार भएको छ ।

प्रहरीले घटना रोक्न नसके पनि झडप सुरू भएपछि प्रहरी चौकी वरियारपुर, जिल्ला प्रहरी कार्यालय बारा र सशस्त्र प्रहरी परिचालन गरी स्थिति नियन्त्रणमा लिएको जिल्ला प्रहरी कार्यालय बाराका डिएसपी राठौरले बताए ।

मठवा टोल र डिही टोलका स्थानीयले सो ठाउँमा छठ पर्व मनाउन छठी घाट बनाउने विषयमा झडप हुन सक्ने भन्दै कात्तिक ११ गते विहान प्रहरी चौकी परियारपुरमा जानकारी गराएका थिए ।

भोलानाथ पौडेल