समाचारहरू

टिकापुर हत्याकाण्डमा संलग्न भएको भन्दै जिल्ला अदालत कैलाली र उच्च अदालत दिपायलबाट जन्मकैदको सजाय सुनाइएका रेशमलाल चौधरीको जन्मकैद सजायलाई सर्वोच्च अदालतले ०८० जेठ २ गते सदर गरेको छ ।

जिल्ला अदालत कैलाली र उच्च अदालत दिपायलले सुनाएको जन्मकैदको फैसलाविरुद्ध चौधरीले ०७७ फागुन १२ गते सर्वोच्च अदालतमा गरेको पुनरावेदनमा सर्वोच्च अदालतका न्यायाधीशद्वय आनन्दमोहन भट्टराई र नहकुल सुवेदीको संयुक्त इजलासले सुनुवाई गर्दै यसअघि जिल्ला अदालत कैलाली र उच्च अदालत दिपायलले सुनाएको कैदलाई सदर गरेको हो ।

त्यस्तै सर्वोच्चका न्यायाधीशद्वय भट्टराई र सुवेदीको संयुक्त इजलासले जिल्ला र उच्च अदालतको फैसलामा जन्मकैदको सजाय सुनाइएका लक्ष्मण थारु चौधरीको हकमा जन्मकैदको फैसला उल्ट्याएर ज्यान मार्ने उद्योगमा तीन वर्षको कैद सजाय सुनाएको छ ।

सीताराम चौधरी र गंगाराम चौधरीलाई सफाई दिएको छ । उनीहरूलाई उच्च अदालत दिपायलले जन्मकैदको फैसला सुनाएको थियो ।

०७२ भदौ ७ गते थरुहटको आन्दोलनका बेला टीकापुरमा नेपाल प्रहरीका एसएसपी लक्ष्मण न्यौपाने सहित आठ जना प्रहरी र एक नाबालकको ज्यान जाने गरी भएको घटनामा संलग्न भएको भन्दै कैलाली जिल्ला अदालतका न्यायाधीश परशुराम भट्टराईको एकल इजलासले ०७५ फागुन १२ गते रेशमलाल चौधरीलाई जन्मकैदको सजाए सुनाएको थियो ।

कैलाली जिल्ला अदालतले जन्म कैदको फैसला सुनाएपछि उक्त आदेश बदर गर्दै चौधरीले उच्च अदालत दिपायल पुनरावेदन गर्नुभएको थियो ।

चौधरीको पुनरावेदनमा उच्च अदालत दिपायलका न्यायाधीसद्वय टेकनारायण कुवँर तथा सीताराम मण्डलको ०७७ पुस २ गतेको संयुक्त इजलासले जिल्ला अदालत कैलालीले गरेको आदेशलाई नै सदर गरेको थियो ।

उच्च अदालत दिपायलको आदेशलाई बदर गर्न माग गर्दै रेशमलाल चौधरीले सर्वोच्च अदालतमा ०७७ फागुन १२ गते पुनरावेदन गर्नुभएको थियो ।

थरुहटको आन्दोलनका क्रममा ०७२ भदौ ७ गते भएको विरोध प्रदर्शन हिंसात्मक बनेपछि भिडले आक्रमण गरेर नेपाल प्रहरीका एसपी लक्ष्मण न्यौपानेसहित सात जना सुरक्षाकर्मीको मृत्यु भएको थियो । सो घटनामा एक बालकको पनि ज्यान गएको थियो ।

उक्त घटनामा संलग्न रहेको आरोपमा एक नाबालक, राष्ट्रिय जनता पार्टीका तर्फबाट २०७४ को निर्वाचनमा प्रतिनिधि सभाका सदस्यमा निर्वाचित रेशम चौधरीसहित २६ जनालाई विभिन्न मुद्दा चलाई पुर्पक्षको लागि कारागार चलान गरिइएको थियो । उनीहरूविरुद्ध कर्तव्य ज्यान, ज्यान मार्ने उद्योग र डाँका चोरी मुद्दा चलाइएको थियो ।

विमल पौडेल