समाचारहरू

पर्वत जिल्लामा क्रियाशील इन्सेकलगायतका मानव अधिकार सङ्घसंस्था र नागरिक समाजका प्रतिनिधिहरूले आगामी मङ्सिर २१ गते हुने निर्वाचनको प्रचारप्रसारका लागि बालबालिका र विद्यालयको प्रयोग नगर्ने व्यवस्था मिलाउन माग गर्दै मुख्य निर्वाचन अधिकृत ध्रुबप्रसाद सापकोटालगायत निर्वाचनसँग सम्बन्धित सरकारी निकायलाई ज्ञापनपत्र बुझाएका छन् ।

जिल्लामा क्रियाशील नागरिक समाज, इन्सेक, गैसस महासङ्घ, नेपाल पत्रकार महासङ्घ, शिक्षाका लागि राष्ट्रिय अभियान, नेपाल, जिल्ला नागरिक सञ्जाललगायतका सङ्घसंस्थाका प्रतिनिधिहरूले मुख्य निर्वाचन अधिकृतका साथै प्रमुख जिल्ला अधिकारी, जिल्ला शिक्षा अधिकारी र जिल्ला निर्वाचन अधिकारीसमेतलाई ज्ञापनपत्र बुझएका हुन् ।

ज्ञापनपत्र बुझ्दै मुख्य निर्वाचन अधिकृत सापकोटाले चुनाव प्रचारप्रसारमा बालबालिका र विद्यालयको प्रयोग हुन नदिन आफू क्रियाशील भएर लाग्ने प्रतिबद्धता व्यक्त गरेका थिए ।

त्यसैगरी सोही ज्ञापनपत्र बुझ्दै प्रमुख जिल्ला अधिकारी राजेश पन्थीले निर्वाचनका कुनै पनि गतिविधिमा बालबालिका र विद्यालयको प्रयोग हुनबाट रोक्ने बताउँदै, मर्यादित र भयरहित निर्वाचनका लागि हातेमालो गर्न नागरिक समाजलाई समेत आग्रह गरेका थिए ।

त्यसैगरी जिल्ला शिक्षा अधिकारी रमेशराज पौडेल र जिल्ला निर्वाचन अधिकारी लक्षु शर्माले पनि ज्ञापन पत्रमा उल्लेखित विषयवस्तुलाई कार्यान्वयन गर्न आफूहरू पूर्ण प्रतिबद्ध रहने बताएका थिए ।

किशोर सापकोटा