चुनाव प्रचारमा अवरोध पुर्‍याएको आरोप

 

नेकपा (एमाले) को तर्फबाट तिलाठी कोइलाडी गाउँपालिकाका उम्मेदवारहरूसहितको टोली चुनाव प्रचारमा जाँदा अन्य दल समर्थित कार्यकर्ताहरूले भदौ २८ गते अवरोध पुर्‍याएको एमाले, सप्तरीले जनाएको छ ।

एमालेका उम्मेदवारहरूको टोलीलाई देखेर मधेस विरोधी पार्टी भन्दै उनीहरूले नारा लगाएर अवरोध पुर्‍याउन खोजेको एमालेकी नेता ममता चौधरीले बताइन् । प्रचारप्रसार टोलीमा सहभागी एमालेका नेता, कार्यकर्ताहरूले आफ्नो कुरा राखेपछि स्थिति समान्य भएको चौधरीले बताइन् ।

नौ नगरपालिका र नौ गाउँपालिका रहेको सप्तरीमा ८ सय ५६ पदका लागि विभिन्न दल र स्वतन्त्र गरी ५ हजार ४ सय ६ जना उम्मेदवार, उनका समर्थकहरूले आ-आफ्नो पक्षमा मत माग्दै घर दैलो कार्यक्रम गरिरहेका छन् ।

हनुमानगर कङ्कालिनी नपामा राजपाले २०७३ को मधेस आन्दोलनमा सप्तरीमा सहिद भएकाहरूको तस्विर राखेर चोक, बिजुली पोलहरूमा फ्लेक्स व्यानर झुण्ड्याएका छन् ।


मनोहरकुमार पोखरेल