चुनाव नजिकिदै जाँदा बम आतङ्क

  ०७४ वैशाख २९ गते

नवलपरासीको चार नम्बर प्रदेशमा पर्ने चार नगरपालिका र चार गाउँपालिकाको निर्वाचन मिति नजिकिदैँ जाँदा ठाउँठाउँमा विस्फोटका घटना भएका छन् ।

यसै क्रममा वैशाख २८ गते कावासोती नगरपालिकाका नेपाली काङ्ग्रेसकाबाट प्रमुखका उम्मेदवार महेन्द्र पोख्रेलको घर अगाडि सकेट बम फेला परेकोमा नेपाली सेनाको बज्रदल गण गैँडाकोटको टोलीले डिस्पोज गरेको छ ।

त्यसैगरी कावासोती नपा-३ स्थित त्रिनेत्र पेट्रोल पम्पको छेउमा सकेट बम विस्फोट भएको छ । विस्फोटबाट कुनै मानवीय र भौतिक क्षति नभएको स्थानीयबासीले बताएका छन् ।

त्यस्तै कावासोती नपा-१७ घर भई माओवादी केन्द्रका प्रमुखका उम्मेदवार डाँसीराम बस्यालको घर अगाडि सकेट बम फेला परेको छ । उक्त बमलाई इलाका प्रहरी कार्यालय नवलपुरका डिएसपी राजेश थापाको नेतृत्वमा नेपाली सेनाको डिस्पोजल टोलीले डिसपोज गरेको छ ।

गैँडाकोट नपा-८ विजयचोकमा नेकपा माओवादी केन्द्रका प्रमुख पदका उम्मेदवार दुर्गादत्त ढुङ्गानाको घर कम्पाउण्डको दुई मिटर अगाडि सकेट बम फेला परेकोमा नेपाली सेनाको डिस्पोजल टोली र इलाका प्रहरी कार्यालय गैँडाकोटका इन्सपेक्टर सुवास हमालको नेतृत्वको टोलीले डिस्पोज गरेको प्रहरीले जनाएको छ ।

त्यसैगरी परासीमा राष्ट्रिय जनता पार्टीले सरकार र प्रतिपक्षी दल एमालेविरुद्ध नाराबाजी गर्दै विरोध सभा गरेको छ ।

संविधान संशोधन नगरी निर्वाचनमा गएको र मधेशको मागलाई बेवास्ता गरेको भन्दै विरोध सभा गर्नुपरेको सो पार्टीका नेताहरूले बताएका छन् ।

संविधान संशोधन र आफूहरूको माग सम्बोधन नभएसम्म दोस्रो चरणको निर्वाचन हुन नदिने सो पार्टीका नेता मुकुरजी गिरीले चेतावनी दिए ।


नारायण पराजुली