समाचारहरू

नाम्खा गाउँपालिकाका बालबालिका अत्याधिक चिसो बढेपछि खुल्ला चौरमा घाम तापेर अध्ययन गर्न बाध्य भएका छन् । हिउँद महिना सुरू भएसँगै बालबालिकाहरू चिसोले कक्षा कोठाभित्र बस्न नसक्ने भएपछि बाहिर चौरमा घाम ताप्दै पढ्न बाध्य भएका हुन् ।

चिसो अत्याधिक बढेपछि खुला चौरमा घाम ताप्दै पढ्न बाध्य भएको नाम्खा गाउँपालिका–५ स्थित मुचु खासरपानि आधारभुत विद्यालय कक्षा ८ मा अध्ययनरत छात्रा सोनाम छिङडुन तामाङले बताउनु भएको छ । कक्षा कोठाभित्र चिसोले पढ्न नसकिने र बाहिर बस्दा हावाहुरीले सकस बनाएको छात्रा तामाङको गुनासो रहेको छ ।

चिसोले खोकी लाग्छ बाक्लो कपडा लगाउनु पर्छ कक्षा ८ मा अध्ययनरत छात्रा पुजा रोकायाको पनि उस्तै गुनासो छ । दिउँसो १ बजेदेखि हावाहुरीले चिसो हुन्छ, पढाइमा ध्यान दिनु भन्दा चिसोबाट कसरी बच्ने तर्फ ध्यान जाने गरेको छात्रा रोकायाले बताउनु भएको हो ।

कक्षाकोठा भित्र बालबालिका राखेर पठनपाठन गर्न सारै सकस हुने भएपछि सम्पूर्ण विद्यार्थीलाई बाहिर राखेर पढाउनु पर्ने बाध्यता भएको खासरपानी आधारभुत विद्यालय मुचुका प्रद्यानाध्यापक हर्कबहादुर बोहराले जानकारी दिनु भएको छ ।

उहाँले बालबालिकालाई पढाउन निकै सकस छ । बाहिर हावाहुरीले धुलाम्मे हुन्छ विद्यार्थीलाई पठनपाठनमा सकस छ । प्रद्यानाध्यापक बोहराको भनाई छ । हिउँद सुरू भएपछि बालबालिकालाई गाहो हुन्छ । ४५ जना बालबालिका अध्ययनरत रहेको विद्यालयमा चिसोले विद्यालय आउन छोडनेको सङ्ख्या पनि बढ्दै गएको प्रद्यानाध्यापक बोहराको भनाई छ ।

अत्याधिक चिसो बढेका कारण मुचुमा माइनस १२ डिग्रि सेल्सीयस तापक्रम छ । जसले बालबालिकामा विभिन्न रोगको संक्रमण बढ्ने गरेको छ । दैनिक दुई देखि चार जना विद्यार्थीमा ज्वरो आउने, टाउको दुख्ने, रुघाखोकी लाग्ने जस्ता विरामी पर्न थालेको विद्यालय स्रोतले जनाएको छ ।

नन्द सिंह