समाचारहरू

चिसोका कारण रौतहटमा चारजनाले ज्यान गुमाएका छन् । पुस १ गतेदेखि सुरु भएको शीतलहरको कारण अत्यधिक चिसोबाट कठ्याँग्रिएर चार जनाको मृत्यु भएको हो ।
दुर्गा भगवति गाउँपालिका ५ बडहर्वाका ६७ वर्षीय विलास सहनी र ६७ वर्षीय जनकदास तत्माको गत पुस ६ गते मृत्यु भएको हो ।

यस अघि पुस ३ गते गुजरा नगरपालिका २ का ५४ वर्षीया गिरीजाकुमारी बैठा र ७० वर्षीय बनहु माझीको चिसोकै कारण मृत्यु भएको थियो । बैठा र माझीको चन्द्रनिगाहापुर अस्पतालमा उपचारको क्रममा मृत्यु भएको हो ।

रौतहटका प्रमुख जिल्ला अधिकारी किरण थापाले जिल्लामा चिसोका कारण चारजनाको मृत्यु भएको बताउनुभयो । तर, यसबारे मेडिकल रिपोर्ट भने नआएको उहाँको भनाइ छ ।

जिल्ला अस्पताल रौटहटका डा. कृष्ण साह भने पोष्टमार्टम बाट चिसोको कारण मृत्यु भएको रिपोर्ट दिने बताउनुहुन्छ ।

यसका लागि काठमाण्डौस्थित त्रिवि टिचिङ्ग अस्पतालमा मात्र पोष्टमार्टम हुने डा. साहको भनाइ छ । अत्यधिक चिसोको कारण विभिन्न रोगहरुले च्याप्ने गर्दा पनि मृत्यु हुने उहाँले बताउनुभयो ।

विगतका वर्षहरुमा चिसोका कारण ज्यान गुमाउनेलाई सरकारले राहत दिँदै आएको थियो । प्रमुख जिल्ला अधिकारी थापाले चिसो मौसममा बाहिर ननिस्कन तथा आगोको साहारा एवम् न्यानो लुगा लगाएर बस्न आग्रह गर्नुभएको छ ।

विपत व्यवस्थापन समितिको पहलमा पुस ७ गते बडहर्वामा अति विपन्न परिवारलाई कम्बल वितरण गरिएको प्रमुख जिल्ला अधिकारी थापाले जानकारी दिनुभयो ।

जिल्ला प्रहरी कार्यालय रौतहटले ५० भन्दा बढी स्थानमा वन कार्यालयको समन्वयमा दाउरा वितरण गरेको इलाका प्रहरी कार्यालय चन्द्रनिगाहापुरका डिएसपी कवित कटवालले बताउनुभयो ।

तीन नगरपालिकाका शैक्षिक संस्था बन्द
अत्यधिक चिसो बढेपछि तीन ओटा नगरपालिकाले नगर क्षेत्रमा रहेका विद्यालय बन्द गर्ने निर्णय गरेका छन् । गरुडा, राजदेवी र वृन्द्रावन नगरपालिकाले सूचना प्रकाशन गरी पुस ११ गतेसम्मका लागि विद्यालय बन्द गर्ने जनाएका हुन्  ।

कोपिला तिमल्सिना