समाचारहरू

इलामका चिया मजदुरहरूले नेपाल सरकारले तोकेको ज्याला भन्दा कम ज्यालामा अहिले पनि काम गरिरहनु परेको गुनासो गरेका छन् ।

मजदुरहरूले वर्षौंदेखि राजपत्रमा प्रकाशित गरिएभन्दा कम ज्यालामै काम गर्न बाध्य हुनुपरेको गुनासो गरेका हुन् ।

सरकारी स्वामित्वमा रहेका इलाम, कन्याम, सोक्तिम र चिलिमकोट चिया बगानमा कार्यरत मजदुरहरूले ज्याला पाए वापतको आफूहरूले तिरेको एक प्रतिशत कर पनि आफ्नो नाममा नहुने र कम्पनीका नाममा जम्मा हुने गरेको बताएका छन् ।

मजदुरहरूले आफ्नो ज्यालाबाट करतिरे पनि करदाता कार्यालयबाट पान नम्बर लिएर आफ्ना नाममा जम्मा गर्न नपाउँदा राज्यलाई कर तिर्ने अधिकारबाट वञ्चित गरेको अखिल नेपाल चिया मजदुर सङ्घकी अध्यक्ष सीता सापकोटाले बताइन् ।

मजदुरहरूलाई ०७४ साउनदेखि बगानमा काम गर्ने मजदुरलाई २ सय ७८ रुपियाँ दैनिक ज्याला दिने व्यवस्था छ । बगानमा काम गर्ने मजदुरले अहिले २ सय ४० रुपियाँमात्र पाउने गरेको कन्यामका चिया मजदुर विष्णु भट्टराईले जनाकारी दिए । इलामका यी बगानमा अहिले स्थायी र मौसमी मजदुर गरेर करिव ८ सय मजदुर रहेको अखिल नेपाल चिया मजदुर सङ्घले जनाएको छ ।

कोकिला ढकाल