समाचारहरू

चितवन क्षेत्र नंं. २ मा उपनिर्वाचन सम्पन्न भएको छ । चितवनमा ०८० वैशाख १० गते सम्पन्न भएको निर्वाचनमा ७८ हजार २ सय ७७ अर्थात ६२ प्रतिशत मत खसेको छ । जम्मा मतदाता १ लाख २४ हजार ६ सय ९५ रहेकोमा ७८ हजार जतिमात्र मत खसेको हो ।

०७९ मङ्सिर ४ गते भएको निर्वाचनमा ६७ प्रतिशत मत सोही क्षेत्रमा खसेको थियो ।

भरतपुर महानगरपालिका-११ को नयाँकिरण मावि मतदान केन्द्रमा दिउँसो नाराजुलुस सहित पुगेका राष्ट्रिय स्वतन्त्र पार्टीका उम्मेदवार रवि लामिछाने र उनको समर्थकबाट मतदान क्षेत्रमा प्रचार तथा नाराबाजी भएपछि तीन घण्टा मतदान स्थगित भएको थियो ।

३ बजेर ३० मिनेटमा पुन सुरु मतदानमा रास्वपाले आचारसंहिता उल्लङ्घन गरेको विषयमा मुख्य निर्वाचन अधिकृतको कार्यालयमा निवेदन परेको र छानविन हुने प्रतिवद्धता लिखित रुपमा गरिएको थियो ।

त्यस्तै राष्ट्रिय स्वतन्त्र पार्टीका उम्मेदवार रवि लामिछाने र चितवनका प्रमुख जिल्ला अधिकारी सुरेन्द्र पौडेलले आचारसंहिता उल्लङ्घन गरेको भन्दै नेपाली कांग्रेस चितवनले मुख्य निर्वाचन अधिकृतलाई छानविनका लागि निवेदन दिएको थियो ।

उपनिर्वाचन भएको विकट क्षेत्रबाट भरतपुरमा मतपेटिका ल्याउन थालिएको छ । मतगणना स्थल भरतपुर स्थित उद्योग सङ्घको प्रर्दशनी हलमा धमाधम मतपेटिका आइरहेको सहायक मतदान अधिकृत इश्वर आचार्यले बताउनु भयो ।

मतदान कहिलेबाट सुरु गर्ने भन्ने विषयमा दलहरूसँग छलफलपछि निर्णय गरिने उहाँको भनाइ छ । मतगणना स्थलमा सिसीक्यामरा र तारजाली राखिएको छ ।

दिपेन्द्र अधिकारी