समाचारहरू

चितवन जिल्लामा बिसीजी खोपको सिरिञ्ज अभाव भएको जिल्ला जनस्वास्थ्य कार्यालय भरतपुरले जनाएको छ । जन्मने बितिक्कै शिशुलाई क्षयरोगविरुद्ध दिने बिसीजी खोपको सिरिञ्ज चितवन जिल्लामै अभाव भएको हो ।

जिल्ला जनस्वास्थ्य कार्यालय भरतपुरले वैशाखदेखि बिसीजी खोपको सिरिञ्ज अभाव हुँदै आएको जानकारी दिएको छ । चितवन जिल्लालाई चाहिएजति बिसीजी खोपको सिरिञ्ज नआउँदा बर्सेनी यसको अभाव हुँदै आएको छ ।

'जिल्ला जनस्वास्थ्य कार्यालयसँग बिसीजी खोपको सिरिञ्ज स्टकमा छैन । हामीसँग भएको सबै सकियो । फिल्डमा अलिअलि होला । अब माग्न आउनेलाई छैन भन्नुपर्छ ।'-जिल्ला जनस्वास्थ्य कार्यालय भरतपुरका कोल्ड चेन अधिकृत वेदप्रसाद अधिकारीले भने । उनले क्षेत्रीय मेडिकल स्टोर हेटौँडाबाट बिसीजी खोपको सिरिञ्ज नआएको बताए ।

चितवनमा वर्षको २५ हजार बिसीजी खोपको सिरिञ्ज आवश्यक पर्ने पनि उनले बताए । कोल्ड चेन अधिकृत अधिकारीले यो वर्षचितवनमा जम्मा १९ हजार बिसीजी खोपको सिरिञ्ज आएको जानकारी दिए । उनले भने-'चाहिन्छ २५ हजार, आउँछ १९ हजार अनि कहाँबाट सिरिञ्ज पुग्छ ?'

दिपेन्द्र अधिकारी