समाचारहरू

चिकित्सा क्षेत्र सुधारको माग गर्दै त्रिविवि शिक्षण अस्पताल महाराजगञ्जका प्रा.डा. गोविन्द केसी असोज १० गतेदेखि पुनः आमरण अनसनमा बसेका छन् ।

चिकित्सा शिक्षासँग सम्बन्धित विषयमा डा. केसीले उठाउँदै आएका माग सम्बोधन प्रक्रियामा केही प्रगति भएपनि संवैधानिक निकायबाट भएका हस्तक्षेप र अनियमितता विषयमा संसद मौन बसेको भन्दै अनसन बस्नु परेको डा. केसीले बताए । यो उनको नवौं पटकको अनसन हो ।

उनले सरकार समक्ष पेश गरेका सुझावअनुरुप संशोधन गरी चिकित्सा शिक्षा ऐन संसदको यही अधिवेशनबाट तुरुन्त पारित गर्न, अख्तियार दुरुपयोग अनुसन्धान आयोग प्रमुख आयुक्त लोकमान सिंह कार्की र आयुक्त राजनारायण पाठकमाथि तत्काल महाअभियोगको प्रक्रिया अघि बढाउन, मेडिकल शिक्षाको शुल्क माथेमा कार्यदलले निर्धारित गरे बमोजिम तथा पछिल्लो सम्झौताबमोजिम कायम गर्दै पछिल्लो पटक निजी मेडिकल कलेजका प्रतिनिधिहरूद्वारा बनाइएको कथित समितिलाई खारेज गर्न माग गरेका छन् ।

त्यस्तै अघिल्लो पल्ट भएको सम्झौताका बाँकी वरिष्ठताका आधारमा कार्यान्वयन गर्न अनसनरत केसीले माग गरेका छन् । अघिल्लो पटक सरकार र डा. केसी समर्थकबीच आइओएममा तत्काल वरिष्ठताका आधारमा डिन नियुक्त गर्ने, आइओएमका पूर्व पदाधिकारीमाथि तत्काल छानबिन गर्ने र कारबाही अघि बढाउने सम्झौता भएको थियो ।

विवेक ढुङ्गाना