समाचारहरू

मणिपाल शिक्षण अस्पतालमा उपचारका क्रममा मृत्यु भएकी ५७ वर्षीया सुकमाया दुराको आफन्त र चिकित्सकसँगको विवाद साम्य बनाउन र शान्ति सुरक्षा कायम गर्न खटिएका इन्स्पेक्टरलेनै ‘डाक्टरहरुलाई कुटेर आएँ’ भन्दै विवाद उक्साएको आरोपमा इन्स्पेक्टर मदन श्रेष्ठलाई जिल्ला प्रहरी कार्यालय कास्कीले निलम्बन गर्न गृह मन्त्रालयलाई सिफारिस गरेको छ ।

उक्त दिनको घटनाका बारेमा छानबिन गर्न प्रदेश प्रहरी कार्यालयका प्रहरी वरिष्ठ उपरीक्षक सुरेशसिंह कोइरालाको संयोजकत्वमा समिति समेत बनेको छ ।

मणिपालमा शान्ति सुरक्षाकै लागि खटिएका वडा प्रहरी कार्यालय बैदामका प्रमुख डिएसपी वेद जोशीलाई पनि जिल्ला प्रहरी कार्यालयमा सरुवा गरिएको कास्की प्रहरी प्रमुख एसपी मोहन थापाले बताउनुभयो ।

दुराको आफन्त र चिकित्सकबिच विवाद उत्पन्न भएपछि चिकित्सकमाथि कुटपिट भएको भन्दै चिकित्सकहरु आन्दोलित छन् । मणिपालमा भर्ना भई उपचार गराइरहेका अरु बिरामीहरुको उपचार पनि प्रभावित भएको छ ।

इन्सेक गण्डकी प्रदेश कार्यालय, पोखरा