समाचारहरू

भक्तपुर नगरपालिका-६ सिद्धि स्मृति महिला तथा बाल अस्पतालका चिकित्सकको लापरबाहीका कारण सुत्केरीको मृत्यु भएको आरोप लागेपछि पीडित पक्ष र अस्पताल प्रशासनबिच छलफल हुँदा अस्पतालमा जन्मेकी बालिकालाई कक्षा १२ सम्म पढाउन अस्पताल तयार भएपछि सहमति भएको छ ।

अस्पताल प्रशासनसँग भएको भदौ १९ गते सहमति भएपछि शवको पोष्टमार्टम नगरी दाहसंस्कार गरेको मृतकका जेठाजु लोकबहादुर तामाङले बताउनु भयो ।

उहाँले अस्पताल प्रशासन र पीडितका आफन्तबिचको छलफलमा अस्पतालमा जन्मिएकी छोरीलाई कक्षा १२ सम्म अस्पतालले पढाइ दिने र उपचारमा लागेको शुल्क मिनाहा गर्ने सहमति भएको जानकारी दिनुभयो ।

काभ्रेको मण्डनदेउपुर नगरपालिका–१ डाँडागाउँकी ३० वर्षीया रिता तामाङको भदौ १८ गते बिहान १० बजे त्रिवि शिक्षण अस्पताल काठमाडौँमा मृत्यु भएको थियो । पीडितका आफन्तले घरबाट सुत्केरी गराउन १५ गते सिद्धि स्मृति अस्पतालमा ल्याएपछि तामाङलाई सोही दिन ४ बजे शल्यक्रिया गरी सुत्केरी गराइएको थियो ।

पीडित पक्षले सिद्धि स्मृति अस्पताका चिकित्सकको लापरबाहीले गर्दा मृत्यु भएका भन्दै घटनाको छानबिन गरी दोषीलाई कारबाहीको माग राखी भदौ १८ गतेदेखि अस्पताल परिसरमा विरोध प्रदर्शन गर्दै आएको थियो ।

बिरामीको अवस्था जटिल भएको भन्दै अस्पतालले एक्कासी  भदौ १७ गते बिहान त्रिवि शिक्षण अस्पतालमा पठाएको हुँदा चिकित्सकले लापरबाही गरेको र ढिलो गरी शिक्षण अस्पताल पठाउँदा बिरामीको मृत्यु भएको पीडित पक्षको आरोप थियो ।

रमेश गिरी