समाचारहरू

बुङ्गल नगरपालिका–६ बड्डीज्यावनबासी चार महिनादेखि खानेपानीको समस्या झेल्दै आएका छन ।

सोलार लिफ्टीङ् प्रविधिबाट निर्माण गरिएको खानेपानी आयोजनाको सौर्य उर्जामा समस्या आएको चार महिना वितिसक्दा समेत मर्मत नहुँदा गत माघ महिनादेखि गाउँमा खानेपानीको समस्या भएको हो ।

सौर्य उर्जा बिग्रिएर धारामा पानी आउन बन्द भएपछि स्थानीयहरु एक घण्टा पैदल हिडेर वेउर भन्ने ठाउँको पानी बोकेर पिउन बाध्य भएका छन् ।

सोलार लिफ्टीङ् प्रविधिबाट खानेपानी आयोजना निमार्ण भएको भएपनि घाम लागेकै दिनमात्र धारामा पानी आउने धेरैजसो बिग्रिरहने समस्या र सोलार लिफ्टीङ् प्रविधिबारे ज्ञान नहुँदा सामान्य बिग्रिए पनि आफूहरुले खानेपानीबाट वञ्चित हुनुपरेको स्थानीय हर्कबहादुर बोहराले गुनासो गर्नु भयो ।

खानेपानी आयोजनाको सौर्य उर्जामा समस्या आएर खानेपानी बन्द भएपछि दुःखका दिन सुरु भएको बड्डीज्यावनकी स्थानीय कलसी धामीले गुनासो गर्नु भयो ।

उहाँले भन्नु भयो– ‘ ६ परीवारका लागि एउटा धारा निर्माण गरीएको छ । तर, गाँउमा सबै धारा रित्ता छन् । धारामा पानी आउँदैन् । पानीको निकै अभाव छ । गाउँका २५ घरधुरीले चार महिनादेखि खानेपानीको अभाव झेल्नु परेको छ । सरसफाइको कुरै छोडौँ, खानेपानी पनि बोकेर ल्याउनु पर्ने बाध्यता रहेको छ ।’

खानेपानीको अभाव भएदेखि विद्यालयमा विद्यार्थीको उपस्थिति पनि न्यून हुने गरेको महादेव आधारभूत विद्यालयका प्रधानाध्यापक मानबहादुर बोहराले बताउनु भयो ।

उहाँले भन्नु भयो– ‘स्कुले केटाकेटीहरु पानी ल्याउन जान्छन । पानी बोक्दा बोक्दै स्कुलको घण्टी बज्छ । घण्टी लागेपछि विद्यार्थीहरु स्कुल आउदैनन् । शिक्षाको गुणस्तर खस्कीदै गएको छ ।’

पानी ल्याउनु पर्ने ठाँउमा मन्दिर हुँदा महिनावारी भएका महिलाहरुलाई समस्या भएको छ । पानी ल्याउने ठाउँ नजिकै बेउर देवताको मन्दिर भएकाले महिनावारी भएको बेला महिलालाई पानी ल्याउन समस्या हुने गरेको र महिनावारी हुँदा पानी नै नल्याई फर्किने गरेको स्थानीय नन्ता बोहराले बताउनु भयो ।

उहाँले भन्नु भयो– ‘देवताको मन्दिर परिसर भित्रबाट पानी ल्याउनु पर्ने भएकाले महिनावारी भएको बेला हामीले जान हुदैन् । कहिले काही पानी बोक्दा बोक्दै छोराछोरीको स्कुल पनि छुट्छ । गाउँमा पुरुष जति कमाईको लागि घर बाहिर जाने भएकाले अधिकांश घर परिवारमा महिला मात्रै हुन्छन ।’

बड्डीज्यावन सोलार लिफ्टीङ् खानेपानी योजना २०७७ सालमा ग्रामिण जलस्रोत व्यवस्थापन परियोजनाको आर्थिक सहयोगमा ३ किलोवाट क्षमताको सौर्य उर्जाबाट १ हजार ५ सय मिटर तलको खोलाबाट लिफ्टिङ् गरी गाउँमा सोलार लिफ्टिङ् प्रविधिबाट खानेपानी आयोजना निर्माण सम्पन्न गरेको थियो ।

लिफ्टीङ् खानेपानी बिग्रिदा पनि परियोजनाले नै मर्मतका लागि सहयोग गर्ने गरेको भएपनि गत असार महिनादेखि परियोजनाको कार्यअवधी सकिएको र आफ्नो क्षेत्राधिकार भित्र नपर्ने भन्दै खानेपानी परियोजनाबाट सहयोग नहुँदा समस्या भएको स्थानीयले बताएका छन् ।

बड्डीज्यावन सोलार लिफ्टीङ् खानेपानी योजनाका अध्यक्ष कल्यान धामीले जिल्ला भित्र लिफ्ट प्रविधिसम्बन्धी ज्ञान भएको दक्ष प्राविधिक नभएपछि दक्ष प्राविधिक काठमाडौँबाट ल्याउनु पर्ने र आफूहरुसँग आर्थिक स्रोत नभएका कारण काठमाडौँबाट प्राविधिक ल्याउन नसकिएको बताउनु भयो ।

यस विषयमा सम्बन्धित निकायलाई जानकारी गराएको भएपनि चार महिनासम्म कुनै निकायले पनि चासो नदेखाएको स्थानीयको गुनासो छ ।

बुंगल नगरपालिकाका प्रमुख जयबहादुर धामीले स्थानीयले भोग्नु परेको खानेपानीको समस्या समाधान गर्न तथा विग्रीएको सोलार लिफ्टीङ् मर्मतका लागि पहल भइरहेको बताउनु भयो ।

सत्यराज सिंह