समाचारहरू

बालश्रमको प्रयोग गरी यातना दिएर १७ घण्टा काममा लगाएको आरोपमा दुई उद्योग सञ्चालकलाई प्रहरीले गिरफ्तार गरेको छ ।

जिल्ला बाल कल्याण समिति भक्तपुर, महानगरीय प्रहरी वृत्त थिमि, सिविन र श्रम कार्यालय टेकुको संयुक्त टोलीले चार जना बालश्रमिकको उद्धार गरेका हुन् ।

सूर्यविनायक नपा-२ बालकोटमा सञ्चालित आर.के. कापी उद्योगको एउटा सटर भित्र तीन जना बालकलाई थुनेर दैनिक बिहान ६ बजेदेखि राति १० बजेसम्म १७ घण्टा काममा लगाएको आरोपमा उद्योग सञ्चालक मधेवन मत्थन पर्साका राजिव चौधरीलाई गिरफ्तार गरिएको प्रहरीले जनाएको छ ।

त्यसैगरी मध्यपुर थिमि नपाको शङ्खधर चोकमा रहेको विशाल माछा पसलमा दैनिक बिहान ६ बजेदेखि राति १० बजेसम्म एक जना बालकलाई १७ घण्टा काममा लगाउँदै आएको आरोपमा भारतको मोतिहारीका सन्तोष गुप्तालाई पनि सोही टोलीले गिरफ्तार गरेको हो ।

टोलीले कापी उद्योगमा काम गर्ने बालश्रमिकहरू भारतको मुजाफुर घरभएका १० वर्षीय शाहिल मोहम्मद, १२ वर्षीय इसाद मोहम्मद र ११ वर्षीय लड्डन मोहम्मदको उद्धार गरेको बाल हेल्पलाइन नेपालका संयोजक सागर भण्डारीले जानकारी दिए ।

त्यसैगरि टोलीले माछा पसलबाट भारत मोतिहारीका १२ वर्षीय मुन्नाज अन्सारीको उद्धार गरेको छ । अत्याधिक कामका कारण बालकहरूको हात खिइएको, बिरामी परेको र उनीहरूको बाल अधिकार चरम रूपमा हनन् भएको अवस्थामा उद्धार गरिएको उनले जानकारी दिए ।

जिल्ला बाल कल्याण समितिका सदस्य सचिव एवम् महिला तथा बालबालिका कार्यालय भक्तपुरकी प्रमुख नीला घिमिरेले गिरफ्तार गरिएकालाई श्रम ऐन अन्तर्गत कारबाही प्रक्रिया अगाडि बढाउने र उद्धार गरिएका बालश्रमिकलाई उनीहरूको परिवारसँग पुनर्मिलन गराउन पहल गरिने बताइन् ।

सविना केसी