घोराही नगरपालिकाद्वारा १८ बालश्रमिक घरैमा पुनःस्थापित

 

घोराही नगरपालिकाले विभिन्न होटेल, वर्कशप, ग्रिल उद्योग, साइकल स्टोर र खोलामा गिट्टी कुट्ने काममा लागेको १८ जना बालश्रमिकलाई कार्यस्थलबाट उद्धार गरी परिवारमा पुनःस्थापित गरेको छ ।

मङ्सिर २० गते कार्यालयमै एक कार्यक्रम गरी घोराही नगरपालिकाका कार्यकारी अधिकृत तुफानसिंह केसीले अभिभावकलाई बोलाएर उनका बालबालिका र जनही १५ हजार रुपियाँका दरले आर्थिक सहयोग हस्तान्तरण गरे ।

गरिबीको कारण देखाउँदै बालबालिकालाई जोखिमपूर्ण काममा लगाउन थालेपछि नगरपालिकाले बालवालिकालाई विद्यालय पठाएर अभिभावकले घरमै आयआर्जन गर्न १५ हजार रुपियाँ सहयोग दिएको नगरपालिकाका सामाजिक विकास अधिकृत सुबोध रेग्मीले बताए ।

पुनःस्थापित हुनेहरू सबै घोराहीकै छन् । नगरपालिकाका अनुसार बन्दना नेपाली, रोशनी नेपाली, दिपेश नेपाली, रविन नेपाली, विकास नेपाली, अञ्जली नेपाली, करण यादव, शिवा विक, भिम नेपाली, पुष्पा चौधरी, पुजा वादी, सुदीप नेपाली, सपना चौधरी, प्रकाश घर्ती, सोनीया नेपाली, उर्मिला विक, सुमन नेपाली र सुनुपुरका अजय पुनलाई कार्यस्थलबाट उद्धार गरी परिवारमा पुनःस्थापित गरिएको हो । यसअघि नगरपालिकाले ३५ जना बालबालिकालाई परिवारमा पुनःस्थापीत गरिसकेको छ ।


जेएन सागर