समाचारहरू

गोरखा जिल्ला घर भइ हाल व्यास नपा-१ बस्ने ४० वर्षीय पत्रकार एसबी नेपालीलाई जिल्ला प्रशासन कार्यालय विरुद्धको समाचार लेखेको आरोपमा तनहुँका सहायक प्रमुख जिल्ला अधिकारी शिशिर पौडेलले कारबाही गर्ने धम्की दिएको घटनाप्रति तनहुँका पत्रकारहरूले आपत्ति जनाएका छन् ।

पत्रकारका विभिन्न सङ्घसंगठनले भदौ ५ गते संयुक्त प्रेस विज्ञप्ति प्रकाशन गरी पत्रकार नेपालीलाई कारबाही गर्ने सहायक प्रजिअको धम्कीको निन्दा गरेका छन् ।

दमौलीबाट प्रकाशन हुने लोकवाणी दैनिकमा भदौ २ गते प्रकाशित 'राहदानी नम्बर खोज्न दुई हजार घुस' शीर्षकको समाचार प्रकाशित भएपछि सहायक प्रजिअ पौडेलले प्रमुख जिल्ला अधिकारीले प्रयोग गर्ने ९८५६०६७७७७ नम्बरको मोवाईलबाट भदौ ३ गते लोकवाणी दैनिकका सम्पादकलाई फोन गरी उक्त पत्रिकाका सम्वाददाता नेपालीलाई कारबाही गर्ने धम्की दिएको पीडितले बताए ।

आफ्नो कार्यालयका कर्मचारीले घुस लिएको समाचार पत्रिकामा प्रकाशित भएपछि उक्त घुसको बारेमा आन्तरिक छानबिन गरी घुस खाने कर्मचारीलाई कारबाही गर्नु पर्नेमा सहायक प्रजिअ पौडेलले पत्रकारलाई कारबाही गर्ने धम्की दिएको भन्दै नेपाल प्रेस युनियन, प्रेस चौतारी, प्रेस सेन्टर नेपाल र नेपाल प्रेस सोसाईटीले संयुक्त विज्ञप्ति निकालेर सहायक प्रजिअको अभिव्यक्ति आपत्तिजनक भएको भन्दै उनलाई माफी माग्न र पत्रकारको सुरक्षाप्रति गम्भीर बन्न अपिल गरेका छन् ।

विज्ञप्तिमा पत्रकारलाई निर्वाध रूपमा समाचार सङ्कलन र लेख्न पाउने अधिकारको सम्मान गर्न अनुरोध गरिएको छ ।

प्रकाशचन्द्र भट्टराई