समाचारहरू

सोलुदुधकुण्ड नगरपालिका – ११ तिङ्लाकी २८ वर्षीया सानुमाया राईले न्याय नपाएको गुनासो गर्नु भएको छ ।

नेपाली सेनामा कार्यरत ३४ वर्षीय पतिको ०७५ असोज २६ गते मृत्यु भएपछि सुुसुराबाट घर निकाला हुनु भएकी सानुमायाले न्याय नपाएको गुनासो गर्नु भएको हो ।

पतिको मृत्यु भएपछि ८० वर्षीया सुसुरा रुङ्थे राईले असोज २६ गते दश वर्षीय नाति निरोज र ६ वर्षीया नातिनी निर्जला र चार वर्षीया नातिनी सिर्जनालाई आफूसँगै राखी घरबाट निकाला गरीदिएको पीडितले बताउनुभयो ।

उहाँले न्यायका लागि असोज २६ गते आरोपित विरूद्ध जिल्ला प्रहरी कार्यालय सोलुखुम्बुमा उजुरी दिएपछि प्रहरीले दुवै पक्षलाई राखी माघ २७ गते मिलापत्र गरी घर पठाएको थियो ।

मिलापत्र गरेर घर फर्किए लगत्तै सुुसुराले घरबाट पुन निकाला गरीदिएपछि आफूले न्याय नपाएको पीडित सानुमायाले बताउनुभयो ।
उहाँले सुसुराले आफूलाई छोराछोरी समेत नदिई सँगै राखेको बताउनुभयो ।

जिल्ला प्रहरी कार्यालयका इन्स्पेक्टर महेन्द्र दर्नालले दुवै पक्षबीच छलफल गराई मिलापत्र गराएर घर पठाएको भएपनि आरोपितले पहिलेकै व्यवहार गर्दा पीडितले दुख पाएको बताउनुभयो । उहाँले आरोपित विरूद्ध घरेलु हिंसा कसुरमा कारबाही अघि बढाउने बताउनुभयो ।

यसैबीच पीडितले न्यायका लागि पहल गरीदिन इन्सेक प्रतिनिधिसँग आग्रह गर्नुभएको छ । इन्सेक प्रतिनिधिले आरोपित विरूद्ध सम्पर्क गर्न खोज्दा सम्पर्क हुन सकेन ।

पति नेपाली सेनामा कार्यरत रहँदा जण्डिसका कारण मृत्यु भएको थियो । पतिकोे मृत्यु पश्चात नेपाली सेनाबाट प्राप्त गर्ने सेवा सुविधाको लागि समेत छोराछोरी सहित हेडक्वाटरमा जानुपर्ने भएपनि छोराछोरी नदिएपछि सेवासुविधाबाट वञ्चित हुनुपरेको साुनमायाले गुनासो गर्नुभयो ।

के छ कानुनी व्यवस्था 
मुलुकी देवानी संहिता २०७४ को भाग ३ को परिच्छेद ४ को दफा ११५ को उपदफा १ (क) मा पाँच वर्ष उमेर पुरा नभएको नाबालक भए आमाले अर्को विवाह गरेको भए वा नभएपनि निजले चाहेमा आमाको जिम्मा, सोही उपदफाको (ख) मा पाँच वर्ष भन्दा माथिको नाबालक भए आमाले अर्को विवाह गरेको बाहेक निजले चाहेमा निजको जिम्मा रहने व्यवस्था उल्लेख छ । उपदफा १ ले सानुमायाको मागलाई सम्वोधन गरेपनि उहाँले न्याय पाउनु भएको छैन ।
सोही दफाको उपदफा ४ मा कुनै नाबालक यस दफा अन्तर्गत आमा वा बाबु मध्ये कुनैको जिम्मा रहेकोमा त्यसरी जिम्मा लिने बाबु वा आमाको मृत्यु भएमा जीवित रहेको आमा वा बाबुले अविलम्ब त्यस्तो नाबालक आफ्नो जिम्मामा लिनुपर्ने छ भन्ने उल्लेख छ ।

भोजराज कार्की