समाचारहरू

घरेलु हिंसाबाट पीडित एक महिलाले सामाजिक सेवा केन्द्र (सोसेक) नेपाल कालिकोटको सुरक्षित आवास गृहमै असोज ७ गते विहान शौचालयमा झुण्डिएको अवस्थामा फेला परेको जिल्ला प्रहरी कार्यालयका डिएसपी अर्जुन केसीले जानकारी दिनुभयो।

सान्नीत्रिवेणी गाउँपालिका–१ माइतिघर भइ दैलेख जिल्ला भगवतिमाइ गाउँपालिका–५ कट्टी निवासी दानबहादुर शाहीकी पत्नी जैशि ०७९ भदौ १२ गतेदेखि पति शाहीले घर निकाला गरेपछि आफ्न्तको आश्रयमा बस्दै आएकी र केहिदिन देखि सोसेकको सुरक्षित आवासगृहमा बस्दै आउनु भएको थियो ।

हाल खाँडाचक्रमा व्यापार गर्दै अएका आरोपित शाहीले ०७९ भदौ १२ गते साँझ लठ्ठीले कुटपिट गर्दा संवेदनशिल अङ्गमा गम्भीर चोट लागेको पीडितले इन्सेक प्रतिनिधिलाई बताउनु भएको थियो ।

घरमा अर्की पत्नी हुँदाहुँदै  २०७५ सालमा जैसीलाई दोस्रो विवाह गरेका शाहीले कथित बोक्सी लगायतका आरोपमा पटक पटक कुटपिट तथा मानसिक र शारीरिक यातना दिने गरेपछि पीडितले एक नाबालक छोरासहित विस्थापित हुनु परेको बताउनु भएको थियो ।

विस्थापित अवस्थामा रहेकी पीडित महिलाले भदौ ९ गते आफ्ना पति शाहीले सामाजिक सञ्जाल म्यासेन्जर मार्फत, कथित बोक्सी आरोप लगाउदै छोरा समेत मारिदिन भनेपछि डेराबाट राति भागेर नेपालगन्ज पुग्नु भएको थियो । पीडितलाई नेपालगञ्जमा खाेजी गरी पत्ता लगाएर प्रहरीले कालिकोट पठाएपछि (सोसेक) को आश्रयमा बस्नुभएको थियो ।

मृतकको पोष्टमार्टम असोज ८ गते जिल्ला अस्पतालका भयाे । घटनाबारेमा थप अनुसन्धान भइरहेको डिएसपी केसीले जानकारी दिनुभयो ।

कालीबहादुर मल्ल