घरेलु हिंसा पीडितको इन्सेकको सहयोगमा मुद्दा दर्ता

घरेलु हिंसा पीडित महिलाले इन्सेकको सहयोगमा पति ३३ वर्षीय श्यामराज धोवी , सासु ५८ वर्षीया शुभावती धोवी , जेठाजु ४० वर्षीय राजाराम धोवीविरूद्ध कात्तिक २३ गते जिल्ला अदालतमा माना चामल र अंश मुद्दा दर्ता गराउनु भएको छ ।

पीडितलाई कानुनी प्रक्रियामा निरन्तरता दिनका लागि कपिलवस्तु नगरपालिका –११ रेहरा घर भई हाल कपिलवस्तु नगरपालिका– ३ सिकोटवा आफन्तको आश्रयमा बस्दै आएकी ३३ वर्षीया तारा धोवीलाई इन्सेकले कात्तिक २२ गते आर्थिक सहयोग गरेको हो ।

मानव अधिकार समूहका अध्यक्ष लगायतका समूहका पदाधिकारीहरूको रोहवरमा इन्सेक जिल्ला प्रतिनिधि पार्वती आचार्यले पीडितलाई ८ हजार रूपियाँ सहयोग हस्तान्तरण गर्नु भएको हो ।

पति र घर परिवारका सदस्यहरुले ०८० भदौ २ गते देखि अत्ती खान लाउन नदिने , बिरामी हुँदा उपचार खर्च नदिने , शारीरीक, मानसिक हिंसा गरेको, गालिगलोज गर्नुका साथै कुटपिट गरी दुई जना बालक सहित घरबाट निकालेको पीडित तारा धोवीले बताउनु भयो ।

आफन्तको सहारामा बस्दै आएकी पीडितले अदालतमा माना चामल र अंशसम्बन्धी मुद्दा दर्ता गर्न आर्थिक तथा कानुनी सहयोगका लागि इन्सेकद्वारा गठित मानव अधिकार समूह कपिलवस्तुमा कात्तिक २० गते निवेदन दिनु भएको थियो ।

मानव अधिकार समूहले कात्तिक २० गते पीडितलाई सहयोग गरिदिन भन्दै इन्सेक कपिलवस्तुलाई सिफारिस गरेको थियो ।


पार्वती आचार्य