घरेलु हिंसा घटनाको उजुरी दर्ता, आरोपित फरार

  २०७९ असोज ३१ गते

पतिको कुटपिटबाट घाइते भएकी त्रिपुरासुन्दरी नपा–२ रुम गाउँकी ४६ वर्षीया चन्द्रकली बुढाका माइती पक्षले घटनामा संलग्नलाई कारबाहीको मागगर्दै ०७९ असोज २८ गते प्रहरी कार्यालयमा उजुरी दिनु भएको छ

४९ वर्षीय पति ललि बुढाले असोज २८ गतेसाँझ घरमा कुटपिट गरेको भन्दै चन्द्रकलीका बाबुले प्रहरी चौकी त्रिपुराकोटमा निवेदन दिनु भएको चौकीका इन्चार्ज रुद्रबहादुर शाहीले जानकारी दिनु भएको छ ।

पतिको कुटपिटबाट घाइते चन्द्रकलि बुढाको त्रिपुरासुन्दरी नगरअस्पतालमा उपचार भइरहेको छ । पीडितका बुवा नरचन्द्र थापाले आफ्नी छोरीलाई कुटपिट गर्ने ज्वाईलाई पक्राउ गरी कारवाही गर्न निवेदन दिनु भएको इन्चार्ज शाहीले बताउनु भयो ।

कुटपिटबाट पीडितको दायाँ तिघ्रा, टाउको र पिठयुमा गहिरो चोट लागेको छ । त्रिपुरासुन्दरी नगरपालिका केन्द्र त्रिपुराकोटबगरमा होटल व्यवसाय गर्दै आउनु भएकी पीडितलाई परपुरुषसँग लागेको आरोपमा पटक पटक पतिले कुटपिट गर्ने गरेको पीडितका आफन्तले चौकीमा दिएको निवेदनमा उल्लेख छ ।

पत्नी कुटपिट घटनाका आरोपित बुढा फरार रहेको प्रहरी चौकीका इन्चार्ज शाहीले बताउनु भयो । उहाँले भन्नु भयो “ललि बुढाका विरुद्ध पत्नी कुटपिटको आरोपमा यसभन्दा अघि पनि दुई ओटा निवेदन दर्ता भएकाले फरार बुढाको खोजी भइरहेको छ” । नगर अस्पतालका अहेव कविप्रसाद उपाध्यायले घाइते पीडितको अवस्था सामान्य रहेको बताउनु भयो ।


विष्णुप्रसाद देवकोटा