समाचारहरू

बेलौरी नगरपालिका–८ लक्ष्मीपुरकी २४ वर्षीया राधा बोटलाई कुटपिट गरी घर निकाला गरेको आरोपमा प्रहरीले २७ वर्षीय पति मनीराम बोटलाई जेठ ९ गते गिरफ्तार गरेको छ ।

आफूलाई कुटपिट गरी घाइते बनाएको र खान लाउन नदिई घर निकाला समेत गरेको भन्दै पीडित महिलाले जेठ ७ गते जिल्ला प्रहरी कार्यालयमा उजुरी दिनु भएकोले आरोपितलाई गिरफ्तार गरिएको महिला, बालबालिका तथा ज्येष्ठ नागरिक सेवा केन्द्रका सई हरिकला शर्माले इन्सेक प्रतिनिधीसँग फोन सम्पर्कमा बताउनु भयो ।

उहाँले पीडित महिलाको हालसम्म पनि नागरिकता र विवाह दर्ता नगरी दिएको पाइएकोले पीडितको नागरिकता र विवाह दर्ता गराई जेठ १३ गते जिल्ला प्रहरी कार्यालयमा उपस्थित हुने गरी छोडिएको बताउनु भयो ।

वैशाख २४ गते लातैलात्ताले पेटमा हानेर छोरीलाई घाइते बनाएपछि उपचारार्थ रहेको अवस्थामा पनि जुवाईले पुनः पटकपटक कुटपिट गरिरहने र घर निकाला गर्ने गरेपछि सुरक्षाका लागि जुवाई विरुद्ध जिल्ला प्रहरी कार्यालमा उजुरी दिनुपरेको पीडितकी ५२ वर्षीय आमा सदभाना बोटले बताउनु भयो ।

अल्पकालिन सेवा केन्द्रकी संयोजक मञ्जु केसीका अनुसार लामो समयदेखि पटकपटक कुटपिट गर्ने, अपशब्द बोल्ने, हातपात गर्ने र घर निकाल गरी अर्को विवाह गर्छु भनेर मानसिक यातना दिने गरेकोले आरोपित विरुद्ध जिल्ला प्रहरी कार्यालयमा उजुरी दिइएको बताउनु भयो ।

कुटपिटबाट घाइते हुनु भएकी पीडित महिलाको स्वास्थ्य उपचार वैशाख २४ गते महाकाली अस्पतालमा गरिएको थियो ।

लिली कुँवर