समाचारहरू

दत्तु-७ की २७ वर्षीया सुना धामीको हत्या गरी ५१ वर्षीय पति धिरेन्द्रसिंह धामी फरार भएका छन् । भगवती गाविस ७ स्थायी घर भइ हाल दत्तुमा अस्थायी बसोबास गर्दै आएकी धामीलाई आरोपितले पुस ११ गते राति घरमा सुतिरहेको अवस्थामा घरेलु हतियार प्रहार गरी हत्या गरेको प्रहरीले जनाएको छ ।

पीडित महिलाको टाउकोमा चोट लागेको र हात भाँचिएको अवस्थामा फेला पारिएको जिल्ला प्रहरी कार्यालय दार्चुलाका इन्स्पेक्टर रणबहादुर चन्दले बताए ।

पीडित महिलाको शव घर भन्दा तल झाडीमा फालिएको अवस्थामा फेला पारिएको इन्स्पेक्टर चन्दले बताए ।

घरमा रहेका छोराछोरीलाई घर भित्र थुनेर उनी फरार भएको पनि प्रहरीले जनाएको छ । मृतक महिलाका जेठा छोरा १२ वर्षीय टाकेश धामीका अनुसार घटनाबारे बाहिर भने मारिदिने धम्की दिएर बावु भागेका हुन् । टाकेशले गाउँलेलाई खबर गरेपछि प्रहरीले आरोपितको खोजी गरिरहेको जानकारी दिएको छ ।

मृतकका एक छोरा तथा सौताका दुई जना छोरा र दुई जना छोरी छन् । यसअघिका दुवै पत्नीले आरोपितलाई छाडेर अर्को विवाह गरेको स्थानीयले बताएका छन् ।

आमाको मृत्युपछि अस्थायी टहरामा बस्दै आएका उनका पाँचै जना छोराछोरीको हेरचाहमा समस्या भएको छ । मृतकका ११ महिने दुधे बालक चादुसिंह धामीको पालन पोषणमा समस्या भएको प्रहरीले जनाएको छ । धामीको परिवार विगत ७/८ महिना यता दत्तुमा अस्थायी बसोबास गर्दै आएका थिए ।

यसैबिच दत्तु गाविसले दुधे बालकसहितका उनका बालबच्चाको पालन पोषणको लागि सहयोग गरिदिन आग्रह गरेको छ । पीडितको तर्फबाट जिल्लास्थित सरोकारवाला निकाय, गाविसलगायत अधिकारकर्मीहरूलाई पीडितलाई सहयोगको लागि आग्रह गरिरहेको पीडितका आफन्त दामोदरसिंह धामीले बताए ।

नरेन्द्रसिंह कार्की