समाचारहरू

शारीरिक तथा मानसिक अवस्था कमजोर भएका कारण घरमै बन्धक बनाइएकी जामुने गाविस-७ धयरेकी ३५ वर्षीया सरस्वती घिमिरेको उपचार सुरु भएको छ । इन्सेकको पहलमा राष्ट्रिय मानसिक स्वास्थ्य स्वावलम्बन सङ्गठन कोशिसले घिमिरेको घरमै गएर उपचार सुरु गरेको हो ।

पीडित महिलाको उपचार प्रक्रिया मङ्सिर ११ गतेबाट सुरु भएको हो । शारीरिक तथा मानसिक अवस्था कमजोर भएपछि घिमिरेलाई दुई वर्षेखि आफ्नै घर भित्र बन्धक बनाइएको र सो घटनाको इन्सेक प्रतिनिधिले गरेको अनुगमनपछि उनको उपचार प्रक्रिया सुरु गरिएको हो ।

इन्सेक जिल्ला प्रतिनिधि प्रकाशचन्द्र भट्टराईले मङ्सिर ८ गते पहिलो पटक घिमिरेलाई उनकै घरमा भेटेका थिए । त्यसबारेमा स्थानीय पत्रिकामा समाचार प्रकाशन गर्न पहल गरेका भट्टर्राईले उपचारका लागि सहयोगको अपिल गरेका थिए । कोशिसले मङ्सिर ११ गते मानसिक रोग विशेषज्ञ नै घरमा लगेर घिमिरेको स्वास्थ्य परीक्षण गरेको छ ।

मणिपाल शिक्षण अस्पताल पोखराका मानसिक रोग विशेषज्ञ डा. प्रकाश थापाले घिमिरेको स्वास्थ्य परीक्षण गरी औषधिसमेत उपलब्ध गराएका छन् । सो अवसरमा डा. घिमिरेले नियमित औषधि सेवन र घरको वातावरण राम्रो भएमा उपचार सम्भव भएको बताए ।

घिमिरेको मानसिक स्वास्थ्यको उपचारको लागि चिकित्सक सहित सम्पूर्ण औषधिको व्यवस्था  कोशिसले गर्ने कोशिसका तनहुँ जिल्ला संयोजक बसन्त भट्टले जानकारी दिए । त्यसको लागि हरेक १५ दिनमा मानसिक रोग विशेषज्ञ ल्याएर घिमिरेको स्वास्थ्य परीक्षण गर्ने र प्रत्येक साता कोशिसका मनोविमर्शकर्ताहरूले घिमिरेलाई परामर्श दिने संयोजक भट्टले बताए ।

घिमिरेका पति लक्ष्मणले यसअघि आफूबाट कमजोरी भएको स्वीकार्दै अब औषधिलाई नियमित गर्ने र पत्नीलाई राम्रोसँग उपचार गराउने बताए । उनले आफ्नो समस्यालाई सम्बोधन गर्न पहल गरेकोमा इन्सेकसहित कोशिस नेपाललाई पनि धन्यवाद दिएका छन् । कोशिसका जिल्ला संयोजक भट्टले इन्सेकले यसबारेमा उजागर गरेर हिंसापीडित महिलाको उद्धारमा राम्रो काम गरेको बताए ।

राष्ट्रिय अपाङ्ग महासङ्घका पश्चिमाञ्चल सचिव तथा जिल्ला विकास समितिको अपाङ्ग जिल्ला समन्वय समितिका उपाध्यक्ष प्रकाश पन्थले घिमिरेको मानसिक स्वास्थ्यको उपचार सँगसँगै शारीरिक स्वास्थ्यको पनि उपचार गरिने बताए ।

यसका लागि उनको शारीरिक स्वास्थ्यको परीक्षण गरी तत्काललाई हृविल चेयर उपलब्ध गराउने, अपाङ्गताको परिचय पत्र उपलब्ध गराउने, सहज शौचालयको व्यवस्था मिलाउने कार्यमा लागिने बताए ।

पीडित महिलाको मानसिक स्वास्थ्य कमजोर भएपछि दुई वर्षअघि घरबाट भागेर आवुँखैरेनी जाँदा पृथ्विराजमार्गमा ट्रकले ठक्कर दिँदा गम्भीर घाइते भई कम्मर भन्दा मुनिको भाग पनि नचल्ने भएको छ ।

प्रकाशचन्द्र भट्टराई