समाचारहरू

कलैया उपमहानगरपालिका-२ अवधापुरमा असार २३ गते १६ वर्षीया बालिका प्रिती पटेलकी घरमै सुतिरहेको अवस्थामा घाँटीमा धारिलो हतियार प्रहार गरी हत्या प्रयास गरिएको छ । घाँटीको दाहिने भागमा १० सेमी गहिरो घाउ लागेको छ ।

कलैया अस्पतालमा उपचार हुन नसकी थप उपचारको लागि उनलाई वीरगञ्ज लगिएको छ । घरमा कोही नभएको अवस्थामा घर पछाडिको ढोकाबाट नचिनेका व्यक्तिले मुख थुनेर हत्या प्रयास गरेको घाइते बालिकाकी काकी इन्दु पटेलले बताइन् ।

पढेर सुतेकी प्रितीलाई घटनास्थलमा लछारपछार भएको छ । घटनाबारे प्रारम्भिक रूपमा परिवारसित सोधपुछ गर्ने काम भइरहेको जिल्ला प्रहरी कार्यालयका एसपी मीरा चौधरीले बताइन् ।

घटनाको समय घाइते प्रितीकी आमा अमिता र बावु महादेव पटेल खेतमा रोपाईं गर्न गएका थिए । दिदी निशा घरकै छेउमा रहेको काकाको घरमा खाजा पकाउँदै थिइन् ।

लक्ष्मीसाह सोनार