समाचारहरू

ओखरकोट गाविस–५ आहालखोलाकी ५६ वर्षीया नमादेवी पोखरेलको घर नजिकै बारीमा विष्फोटक पदार्थमा परी मृत्यु भएको घटना सम्बन्धमा सत्यतथ्य पत्ता लगाउन पीडित परिवारले माग गरेको छ ।

पीडत परिवारले भदौ ३१ गतेसम्म पनि घटनाको सत्यतथ्य सार्वजनिक नहुँदा आफूहरू झन् पीडामा परेको बताउँदै अपराधी पत्ता लगाई कानुन अनुसार कारबाही गर्न सरकारसमक्ष माग गरेको हो ।

पीडित परिवारलाई उचित क्षतिपूर्तिसहित न्याय दिलाउनसमेत माग गरिएको छ । पीडित महिलाको ०७१ चैत ५ गते दिउँसो बम विस्फोटनबाट मृत्यु भएको थियो ।

सो बम कसले किन राखेको हो ? दोषी को हो ? भन्ने विषयमा हालसम्म पत्ता लाग्न नसकेको र सो घटनाबाट आफूहरूले न्याय पाउन नसकेको कारण राज्यलाई दबाब दिइरहेको मृतकका माइला छोरा प्रमोद पोखरेलले बताए ।

हालसम्म पनि घटनाको दोषी पत्ता लगाउन नसक्नु राज्यको कमजोरी भएको भन्दै आफूहरूले पत्रकार सम्मेलन गरी सहयोग गर्न अधिकारकर्मी र सञ्चारकर्मी सबैलाई आग्रह गरेको बताए ।

सो घटनाका बारेमा छानबिनका लागि सरकारले गृहमन्त्रालयका उपसचिव केशवराज आचार्यको संयोजकत्वमा तीन सदस्य छानबिन समिति गठन गरी घटनाको प्रतिवेदन गृह मन्त्रालयमा बुझाएपनि मन्त्रालयले भदौ ३१ गतेसम्म उक्त घटनाको प्रतिवेदन सार्वजनिक गरेको छैन ।

रविन्द्र पाण्डे