समाचारहरू

जिल्ला स्वास्थ्य कार्यालय तनहुँले ग्रामीण क्षेत्रका स्वास्थ्य चौकीहरूमा 'म्याद' गुज्रिएका पठाएको फेला पारिएको छ ।

जिल्ला स्वास्थ्य कार्यालय तनहुँको आयोजना, मानव अधिकार निगरानी समूह मनपाङको संयोजन तथा नेपाल एकीकृत ग्रामीण विकास केन्द्रको सहजीकरणमा माघ २७ गते मनपाङ स्वास्थ्य चौकीमा आयोजित सार्वजनिक सुनुवाइको क्रममा सो स्वास्थ्य चौकीले 'म्याद' सकिएका औषधि वितरण गरेको भेटिएको हो । ति औषधिहरू केही दिन अघि मात्र जिल्ला स्वास्थ्य कार्यालयले मनपाङ स्वास्थ्य चौकीलाई उपलब्ध गराएको स्वास्थ्य चौकीले जनाएको छ ।

मनपाङ स्वास्थ्य चौकीका प्रमुख जीवन गुरुङले जिल्ला स्वास्थ्य कार्यालयले केही दिन अघि मात्र आफूहरुलाई उपलब्ध गराएको औषधिको 'म्याद' छ होला भन्ने भएको कारण आफूहरूले वितरण गरेको बताए । उक्त स्वास्थ्य चौकीले गत असोजमै 'म्याद' सकिएको औषधिसमेत वितरण गर्दै आएको थियो । त्यस्तै केही दिन अघि मात्र उपलब्ध गराइएको केही औषधिहरूको 'म्याद' माघ मसान्तसम्म मात्र रहेको छ ।

केही दिन अघिसम्म जिल्लाका सबैजसो स्वास्थ्य चौकीमा औषधिको अभाव भएपछि काठमाडौँबाट खरिद गरेर ल्याएको औषधिमा 'म्याद' सकिएको समेत परेको हुन सक्ने जिल्ला स्वास्थ्य कार्यालयका प्रमुख डा. पवनजङ्ग रायमाझीले बताए ।

जिल्लामा औषधिको अभाव भएपछि केही दिनलाई भएपनि काम चलाउँ भनेर ल्याउँदा 'म्याद' सकिने बेला भएको औषधि पनि परेको हुन सक्ने उनको भनाइ थियो ।

प्रकाशचन्द्र भट्टराई