समाचारहरू

सुर्खेतको ग्रामीण क्षेत्रका मुख्य बजारमा म्याद सकिएका खाद्यान्न लगायतका दैनिक उपभोग्य सामानहरू खुलेआम विक्री वितरण भएपछि चार्डपर्वको समयमा यहाँका उपभोक्ता स्वच्छ र स्वस्थ खाद्य उपभोग गर्नबाट वञ्चित भएका छन् । नियमित बजार अनुगमन नगरेका कारण ग्रामीण क्षेत्रका उपभोक्ता स्वच्छ र स्वस्थ खाद्य उपभोग गर्नबाट वञ्चित भएका हुन् ।

गुटु, बाबियाचौर, बिजौरा, कुनाथरी तथा पूर्वी क्षेत्रका मुख्य बजार छिञ्चु, रामघाट, दशरथपुर, मेहेलकुना, गुमी, बोटेचौर र मैनतडा बजारमा खुलेआम म्याद गुज्रेका खाद्यान्नलगायतका दैनिक उपभोग्य सामान विक्री वितरण हुँदै आएकाले यहाँका उपभोक्ता स्वस्थ्य खाद्य उपभोग गर्नबाट वञ्चित हुनुपरेको उपभोक्ता हित संरक्षण मञ्च सुर्खेतका अध्यक्ष आकाशतारा वयकले बताए ।

जिल्ला प्रशासन कार्यालयको नेतृत्वमा रहेको बजार अनुगमन समितिले वीरेन्द्रनगर बजारमा बेलाबखतमा अनुगमन गरेपनि ग्रामीण क्षेत्रका ससाना बजारको अनुगमन नगर्दा आम उपभोक्ता स्वस्थ खाद्य उपभोग गर्नबाट वञ्चित हुनुका साथै कालो बजारीयाले प्रश्रय पाएको अध्यक्ष वयकले जानकारी दिए ।

बजार अनुगमन समितिका संयोजक एवम् जिल्ला प्रशासन कार्यालय सुर्खेतका प्रशासकीय अधिकृत हितप्रसाद पौडेलले तत्काल ती बजार क्षेत्रको अनुगमन गरिने र नागरिकको सुरक्षित एवम् स्वस्थ खाद्य उपभोग गर्न पाउने अधिकार सुनिश्चित गर्ने बताए ।

दुर्गा थापा