समाचारहरू

चन्दननाथ नगरपालिका – ६ बसपार्कस्थित असार १२ गते राती ९ बजेतिर पद्मा आचार्य अधिकारीको ग्यारेजमा आगलागी भयो । आगलागीपछि आगो नियन्त्रण गर्नका लागि स्थानीयदेखि सबै प्रहरी प्रशासन र चन्दननाथ नगरपालिकाको दमकललाई खबर  भयो ।

आगलागी पीडित अधिकारीले भन्नु भयो ‘आगो नियन्त्रण गर्न नगरपालिकाको दमकल नै आएन । स्थानीय र प्रहरी प्रशासनको सहयोगमा आगो नियन्त्रण भयो । तर ग्यारेजका सबै सामान जलेर नष्ट भयो । ’

जिल्ला प्रहरी कार्यालयका डिएसपी छेदिलाल कामतिका अनुसार स्थानीय र प्रहरीको सहयोग आगो नियन्त्रण भएको हो । आगो नियन्त्रण गर्न दमकल नपुगेपछि छिनागाउँ र महतगाउँका व्यक्ति आक्रोसित भएर नगरपालिका तोडफोड गरेको बुझिएको छ ।

उहाँले भन्नुभयोे  ‘नगरपालिका कार्यालयका झ्यालका सिसा, दमकल र डोजरका सिसासमेत तोडफोड भएका छन् । ग्यारेजमा भएका सवारी साधनका डकुमेन्ट सङ्कलन गरिहेका छौँ । दुबै तर्फको क्षतिको एकिन भएको छैन । ’

नगरपालिका तोडफोडमा संलग्न दुई जनालाई गिरफ्तार गरिएको छ । गिरफ्तार पर्नेमा चन्दननाथ नगरपालिका – ६ का ३३ वर्षीय मानव महत र  वडा नम्बर ७ का ३२ वर्षीय कटक बहादुर रोकाया रहेका छन् । अन्यको खोजी भइरहेको प्रहरीले जनाएको छ ।

८२ लाख रूपियाँ मूल्य बराबरको दमकल, ३८ लाख ९९ हजार रूपियाँ बराबरको मूल्यको स्काभेटरसमेत तोडफोड गरिएको छ । नगरप्रमुख राजुसिंह कठायतले नगरपालिकामा अनावश्यक तोडफोड हुनु निन्दनीय भएको बताउनु भयो । यस्तै नगर उपप्रमुख रामदेवी खड्काको घरमा समेत क्षति पुर्याइएको छ ।

उपप्रमुख खड्काले आफ्नो घरमा समेत ढुङ्गामुढा गरिएको बताउनु भयो । उहाँका अनुसार अराजक रूपमा तोडफोड गरिनु दुःखद पक्ष हो । नगरपालिका तोडफोडमा संलग्नलाई कारबाही हुनुपर्ने उहाँले बताउनु भयो । नगरपालिकाले रातिको समयमा ट्याक्टर चढेर आइ कार्यालय हाताभित्र प्रवेश गरि अपरिचित व्यक्तिहरूले हुल हुज्जत गरि कार्यालय भवनका झ्यालका सिसाहरू साथै दमकल र डोजरमा समेत तोडफोड गरि सरकारी सम्पत्ति हानी नोक्सानी गर्ने विरूद्व कडा कारबाही गर्न माग गरेको छ ।

उपप्रमुख खड्काले भन्नुभयो ‘दुई सातादेखि दमकल बिग्रेको छ । मर्मतका लागि दमकलका पाटपुर्जा बाहिर जिल्ला पठाएको छ । यसअघि पनि आगलागी भएको सबै ठाउँमा पठाउने गरेका थियो । यतिबेला बिग्रेको हुनाले पठाउन सकिएन । दमकल आएन भनेर यसरी तोडफोड गर्नु उचित होइन ।’

छिटोछरितो दमकल पठाउन पनि सडक साँघुरा छन् । सहजै दमकल जाने सडक छैन । दमकल ढिलो आए भनेर पनि गालीगलोज, ढुङ्गामुढा गर्ने गरिएको छ । अहिले भएको दमकल ठुलो भएकोले साँघुरो सडकमा छिटोछरितो जान नसेकोले अलि सानो खालको दमकलको व्यवस्थापन गर्ने तयारी गरिएको उपप्रमुख खड्काले बताउनु भयो ।

मानदत्त रावल