समाचारहरू

गौर नगरपालिकामा स्थित राइस मिल्सको चौरमा भएको घटनाको दोषीलाई कारबाहीको माग गर्दै पीडित परिवारले साउन १८ गते पनि धर्ना जारी राखेका छन् । गौर हत्याकाण्ड पीडित सङ्घर्ष समितिको आयोजनामा साउन १३ गतेदेखि चन्द्रनिगाहपुरमा अनिश्चितकालिन धर्ना दिएका हुन् । गौर हत्याकाण्ड पीडित सङ्घर्ष समितिका संयोजक रुपसागर देवीले गौर हत्या घटनाको छानविन गर्न, दोषीलाई कानुनको दायरामा ल्याउन, मृतकहरुलाई सहिद घोषणा गर्न र पीडित परिवारलाई उचित क्षतिपुर्ति दिन माग गर्दै अनिश्चितकालिन धर्ना दिएको बताउनु भयो ।

साउन १५ गते घोषणा गरिएको अनिश्चितकालिन रौतहट बन्द घोषणाको कार्यक्रम स्थगित गरी अनिश्चितकालिन धर्ना कार्यक्रम भने जारी राखिएको सङ्घर्ष समितिका संयोजक रुपसागर देवीले जानकारी दिनु भयो । उहाँले भन्नु भयो–“मेरो पति नरमदेश्वर उपाध्यायलाई फोरमका कार्यकर्ताले गौरमा हत्या गरे, गौर हत्या घटनाका पीडितहरूले न्याय पाउनु पर्छ ।” तत्कालीन मधेशी जनअधिकार फोरम र नेकपा माओवादी निकट मधेशी राष्ट्रिय मुक्ति मोर्चाले गौरको मिल्स एरिया चौरमा गरेको आमसभाका क्रममा २०६३ चैत ७ गते भएको झडप घटनाको इन्सेकले स्थलगत अध्ययन गरेको थियो ।

आमसभा स्थलमा सबैभन्दा पहिले फोरमका समर्थकहरूले माओवादीहरू जुलुसमा रहेको समयमा माओवादीको मञ्च तोडफोड गरेको र त्यसको करिव ७ मिनेटपछि माओवादीका कार्यकर्ताहरू राइस मिल्सको चौरको उत्तरपट्टीबाट दौड्दै एक्कासी फोरमको मञ्चतर्फ तोडफोड गरेको इन्सेक प्रतिवेदनमा उल्लेख छ । घटनालाई माओवादीले दोहोरो झडप होइन भने पनि राइस मिल्स परिसरमा केहि बेर दोहोरो झडप भएको इन्सेकको प्रतिवेदनमा उल्लेख छ । दुवै पक्षले एकै साथमा कार्यक्रम गर्ने पूर्व जानकारी हुँदाहुँदै पनि स्थानीय प्रशासनले समयमै उचित सतर्कता नअपनाउनुका साथै समयमै आवश्यक कदम नचालेका कारण ठूलो सङ्ख्यामा मानवीय क्षति भएको प्रतिवेदनमा भनिएको छ ।

उक्त घटनामा २५ जनाको मृत्यु भएको तथा दुई जनाको सनाखत हुन नसकेको र ५२ जना घाइते भएको इन्सेकले गरेको स्थलगत अध्ययन प्रतिवेदनमा उल्लेख छ । घटनाका दोषीलाई कानुन बमोजिम कडा कारबाही गर्न, घटनाका क्रममा घाइते भएकालाई तत्काल उपचार तथा मृतकका परिवारलाई उचित क्षतिपूर्तिको व्यवस्था गर्न र घटनाको प्रकृति हेर्दा सामान्य अनुसन्धानबाट मात्र सबै सत्यतथ्य बाहिर आउन नसक्ने देखिएकाले अधिकार प्राप्त उच्चस्तरीय न्यायिक छानविन आयोग गठन गर्न इन्सेकले प्रतिवेदनमार्फत सरकारलाई सुझाव दिएको थियो ।

रौतहटको गौरमा मधेशी जनअधिकार फोरम र माओवादीद्वारा आयोजित आमसभाका क्रममा भएको घटनाको स्थलगत अध्ययन प्रतिवेदन

धरमदेव कुमार पासवान