समाचारहरू

अज्ञात समूहको गोली लागेर देवदह नपा-२ ढेकारका व्यवसायी तथा नेकपा एमाले निकट युवासङ्घ नेपालका पूर्व क्षेत्रीय कोषाध्यक्ष ४१ वर्षीय बलु भन्ने बसन्त पौडेलको मृत्यु भएको छ ।

पौडेलको टाउको र छातीमा गोली लागेको प्रहरीले जनाएको छ । बिहान आगो तापेर आफ्नै काठमिल उज्जल स-मिलमा बसेका पौडेललाई मोटरसाइकलमा आएका दुई जनाले पौने ११ बजे गोली हानेर रोहिणी खोलातिर भागेको प्रत्यक्षदर्शीले बताएका छन् ।

गोली लागेर भुइँमा ढलेका पौडेललाई उपचारका लागि लुम्बिनी अञ्चल अस्पताल बुटवलमा पुर्‍याइएको भएपनि उनको मृत्यु अस्पताल पुग्नु अघि नै भएको अस्पतालले जनाएको छ ।

दुर्गा तिवारी हत्या काण्डका आरोपित मनोज पुनले टेलिफोनमार्फत स्थानीय सञ्चारकर्मीसमक्ष उनको हत्या गरेको जानकारी दिएका छन् ।

मृतक पौडेललाई दुर्गा तिवारीको हत्या लगत्तै 'अब मर्ने तेरो पालो' भनेर टेलिफोनमार्फत धम्की दिएका थिए । आफ्नै आँखा अगाडि पतिलाई गोली हानी हत्या गरेको देखेकी मृतककी पत्नी ३५ वर्षीया सावित्री पौडेल बेलाबेलामा अचेत हुने र मुर्छा पर्ने गरेकी छिन् ।

आफ्ना कार्यकर्तालाई एकपछि अर्को गर्दै हत्या गरेको विरोधमा बुटवलमा युवा सङ्घ नेपाल रूपन्देहीले अनिश्चितकालीन रूपन्देही बन्दको आह्वान गरेको जनाएको छ ।

युवा सङ्घ नेपाल रूपन्देहीका अध्यक्ष नकुल शाही ठकुरीले घटना निन्दनीय भएकाले हत्यारालाई गिरफ्तार गरी कारबाहीको माग गर्दै अनिश्चितकालीन बन्दको आह्वान गरेको बताए ।

मृतकको शवलाई अहिले लुम्बिनी अञ्चल अस्पतालको शव गृहमा राखिएको छ । इलाका प्रहरी कार्यालय बुटवलका डिएसपी पवनकुमार भट्टराईले हत्यामा संलग्नहरूको खोजी कार्य भइरहेको जानकारी दिए ।

रीमा बि.सी.