गोकुलेश्वर अस्पतालका स्वास्थ्य उपकरण मर्मत नहुँदा बिरामीहरुको चेकजाँच तथा उपचारमा समस्या

  ०८१ वैशाख ७ गते

शैल्यशिखर नगरपालिकास्थित गोकुलेश्वर अस्पतालमा रहेको एक्सरे मेसिन विग्रिएको दुई महिना वितिसक्दा समेत मर्मतसम्भार नहुँदा स्थानीयहरुको उपचार सेवा नै प्रभावित हुदै आएको छ ।

‘एक्सरे मेसिन नहुँदा बिरामीको चेकजाँच हुन सकेको छैन्,’ गोकुलेश्वर अस्पतालका डाक्टर मनोज पालले भन्नु भयो, ‘बिरामी आउँदा सिधैं बाहिर पठाउनु पर्ने अवस्था छ ।’ अस्पतालमा रहेको एक्सरे मेसिन पनि वैशाख ४ गतेदेखि चलेको छैन् । उपकरणहरु दिनप्रतिदिन बिग्रिदै गएपछि यस क्षेत्रका सेवाग्राहीहरुले समस्या भोग्नुपरेको छ ।

बिरामीको रगत परीक्षण गर्ने उपकरण (कुल्टर) पनि विग्रिएको लामो समय भइसक्यो । अस्पतालमा रहेका सबै उपकरण विग्रिदा बिरामीको चेकजाँच गर्न समस्या भएको र विग्रीएका स्वास्थ्य उपकरणहरुको मर्मतसम्भारतर्फ ध्यान जाननसकेको डाक्टर पालको भनाइ छ ।

शैल्यशिखर नगरपालिका अन्तर्गत रहेको गोकुलेश्वर अस्पतालको उपकरण विग्रिए पनि मर्मत सम्भार हुन नसकेको स्वास्थ्यकर्मी बताउँछन् । यो अस्पतालमा जिल्लाका मालिकार्जुन, नौगाड, अपिहिमाल र मार्मा गाउँपालिकाको साथै बैतडी जिल्लाको डिलाशैनी क्षेत्रका अधिकांश बिरामी यहि उपचार गराउँछन् ।

स्वास्थ्य उपकरणहरुको व्यवस्थापन तथा मर्मतसम्भार गर्नका लागि स्थानीय सरकारले समयमै ध्यान नदिएका कारण नागरिकहरुले स्वास्थ्य चेकजाँच गर्न सास्ती खेप्नुपरको स्थानीय राजेन्द्र पन्तले गुनासो गर्नु भयो ।

उहाँले भन्नु भयो–‘हामीले समयमै अस्पतालका उपकरण व्यवस्थापन र औषधिको लागि स्थानीय सरकारलाई आग्रह गरेका छौँ । पहल गर्छौँ भन्नु भएको छ । अस्पतालमा औषधि अभाव हुँदै गइरहेको छ । स्थानीय तहका स्वास्थ्य संस्थामा पनि प्रयाप्त औषधि छैन् । अस्पतालको समस्या बारे हामीले खबरदारी गरेका छौँ ।’

शैल्यशिखर नगरपालिका–२ का चक्रमान विक गोकुलेश्वर अस्पतालमा सामान्य औषधि समेत नपाउँदा आफ्नो बुवाले ज्यान गुमाएको दाबी गर्नु भयो । यति ठूलो अस्पतालमा सामान्य औषधि नपाउनु विडम्बना छ, उहाँले भन्नु भयो, ९८ प्रकारका औषधि पाउँछ भन्छन्, तर, अस्पताल आउँदा केही पाउन सक्ने अवस्था छैन् ।

शैल्यशिखर नगरपालिका स्वास्थ्य संयोजक शिवदत्त जोशीका अनुसार अस्पतालमा विग्रिएका उपकरण बारे आफू जानकार भएको बताउनु भयो । हामीले उपकरण मर्मतको लागि प्रयास गरिरहेका छौँ । प्रयाप्त बजेट अभावले पनि समयमै काम गर्न नसकिएको तर स्वास्थ्य संस्थाहरुमा भने औषधि अभाव नभएको उहाँको दाबी छ ।

शैल्यशिखर नगरपालिकाभरी एक अस्पताल सहित २२ ओटा स्वास्थ्य संस्था छन् । गोकुलेश्वर अस्पतालको स्तरोन्नति तथा प्रभावकारी सञ्चालनको लागि अन्य स्थानीय तहसँग पनि समन्वय भइरहेको शैल्यशिखर नगरपालिकाका प्रमुख प्रशासकीय अधिकृत भोजराज भट्टले बताउनु भयो ।

उहाँले भन्नु भयो– ‘एउटै स्थानीय तहले सञ्चालन गर्न सक्ने अवस्था छैन् । सबैको लागि पायक पर्ने ठाउँमा रहेको अस्पताल हुँदा स्रोतमा समन्वय भइरहेको छ ।’

शैल्यशिखर नगरपालिकाका प्रमुख विजयसिह धामीले अस्पताललाई प्रदेश सरकार मातहत सञ्चानल गर्न आवश्यक रहेको बताउनु भयो  । बजेट स्रोत प्रयाप्त छैन् । आन्तरिक स्रोत छैन् । ‘हामीसँग भएको श्रोतले स्वास्थ्य हेर्ने कि शिक्षा हेर्ने,’ उहाँले भन्नु भयो, ‘सबै ठाउँमा थोरै थोरै गर्दा पनि बजेट पु¥याउन सकिने अवस्था छैन् ।’


नरेन्द्रसिह कार्की