समाचारहरू

गैरकानुनी रूपमा भारतको हिमाञ्चल प्रदेशमा लामा भाषा पढाउने भन्दै बसमा लैजाँदै गरेको अवस्थामा २० जना बालबालिकालाई प्रहरीले पुस २५ गते तिला गाउँपालिकास्थित कुडारीबाट उद्धार गरेको छ । बालबालिकाले भरिएको बसलाई प्रहरीले चेकजाँच गर्दा भारत लैजाने कुनै आधार नभेटिएपछि बालबालिकाको उद्धार गरेको हो ।

गैरकानुनी रूपमा जिल्ला बाहिर लैजाँदै गरेको आरोपमा पातारासी गाउँपालिका-३ का २९ वर्षीय छिरिङ तुण्डुक तामाङ र सोही ठाउँका ३२ वर्षीय कार्मा तामाङलाई पुस २५ गते गिरफ्तार गरी अनुसन्धान सुरू गरिएको जिल्ला प्रहरी कार्यालयका इन्स्पेक्टर चुडामणी पुनले बताए ।

लामा भाषा पढाइदिने भन्दै अभिभावकलाई आश्वासनमा पारेर उनीहरूले बालबालिकालाई भारत लैजान लागेको अवस्थामा बसलाई नियन्त्रणमा लिई बालबालिकाको उद्धार गरिएको इन्स्पेक्टर पुनले बताए ।

उनका अनुसार उद्धार गरिएका बालबालिका ७ देखि १४ वर्षउमेर समूहका छन् । जिल्लाको पातारासी गाउँपालिकाका खस/क्षेत्रीका बालबालिकालाई ललाईफकाई लगिएको र लैजाने कुनै आधार नभएकाले प्रहरीले लामा जातिका दुई जनालाई गिरफ्तार गरेको छ ।

'एउटा बसमा धेरै बच्चा लैजाँदै गरेको देखेपछि सोधपुछ गरियो ।'-इन्स्पेक्टर पुनले भने-'लैजाने आधार रहेनछ । त्यसैले नियन्त्रणमा लिइएको हो ।' उनका अनुसार दुई जनालाई अनुसन्धानका लागि हिरासतमा राखिएको छ । बालबालिकालाई प्रहरीको निगरानीमा होटलमा राखिएको छ ।

महिला तथा बालबालिका कार्यालयले बालबालिकाको नाम सार्वजनिक नगर्ने भनेपछि उद्धार गरिएका २० जना बालबालिकाको नाम र फोटो सार्वजनिक गरिएको छैन । उद्धार गरिएका बालबालिका बुढा, बोहोरा, महतारा र कामी जातीका रहेका छन् । सबै बालक मात्र रहेका छन् । उद्धार गरिएका बालबालिकाका अभिभावकलाई छलफलमा राखेर अभिभावकलाई बुझाउने जिल्ला प्रहरी कार्यालयले जनाएको छ ।

मानदत्त रावल