समाचारहरू

नेत्रविक्रम चन्द (विप्लव) नेतृत्वको नेकपाले नेपाल बन्द आह्वान गरेको दिन एका बिहानै मध्यविन्दु नगरपालिका–११ मा गुडिरहेको ट्रकमा प्रहार गरिएको पेट्रोल बलमे ट्रकका चालक ३३ वर्षीय अमर बिक घाइते भएका छन् ।

बिकको ढाड र अनुहार पालेको जिल्ला प्रहरी कार्यालय नवलपरासी (बर्दघाट सुस्ता पूर्व)का डिएसपी अर्जुन रानाभाटले जानकारी दिए ।

जेठ १३ गते बिहान करिव ३ बजे महेन्द्र राजमार्गमा पश्चिमबाट पूर्वतर्फ आउँदै गरेको लु २ ख १०८ नं.को ट्रकमा अज्ञात पक्षले पेट्रोल बम प्रहार गरेको डिएसपी रानाभाटले बताए ।

बम प्रहार हुँदा ट्रक अनियन्त्रित भई सडक भन्दा ५ मिटर तल खसेको थियो । ट्रकका सहचालकको भने अवस्था सामान्य रहेको प्रहरीले जनाएको थियो ।

ट्रकमा लागेको आगो प्रहरीले केही समयपछि नियन्त्रणमा लिएको थियो । घटनास्थल प्रहरी चौकी अरुणखोलाबाट १ किमी पूर्व रहेको छ ।

विप्लव नेतृत्वको नेपाल कम्युनिष्ट पार्टीले सोमबार बन्द आह्वान गरेको हुँदा बम प्रहारमा सो पार्टीको संलग्नता हुन सक्ने डिएसपी रानाभाटले बताए ।
यसैगरी जेठ १३ गते नै कावासोती–१६ मा पश्चिमतर्फ जाँदै गरेको बा ३ च ९३ नं.को जिपमा पेट्रोल बम प्रहार भएको छ ।

बिहान साढे ३ बजे बम प्रहार हुँदा जिपको त्रिपाल जलेको प्रहरीले जनाएको थियो । बम प्रहारबाट लागेको आगो प्रहरीले नियन्त्रणमा लिएको छ ।

तिर्थराज डुम्रे