समाचारहरू

गोसाइकुण्ड गाउँपालिका-१ का वडा अध्यक्ष उर्केनछिरिङ तामाङलाई बिना कारण प्रहरीले गिरफ्तार गरेको प्रति आपत्ति जनाउँदै स्थानीय तथा नेकपा (एमाले) ले तत्काल रिहाइको माग गर्दै जिल्ला प्रशासन कार्यालय र जिल्ला प्रहरी कार्यालयमा ०८० कात्तिक १८ गते ज्ञापन पत्र पेस गरेका छन् ।

गोसाइकुण्ड गाउँपालिका-१, थुमन गाउँमा कात्तिक ५ गते राति खाना खाइरहेको अवस्थामा भएको झडपमा ६३ वर्षीय भेण्डा भनिने फुर्पुछिरिङ तामाङलाई सोही ठाउँका ४२ वर्षीय काले भनिने छिरिङ तामाङको एक समूहले धारिलो हतियार प्रयोग गरी कुटपिट गरी घाइते पारेका थिए । घाइतेको उपचार कात्तिक ६ गते काठमाडौँस्थित न्यूरो अस्पतालमा भयो ।

सो घटनाको विषयमा वडा अध्यक्षको पहलमा पटक पटक वडा तथा प्रहरी चौकी, थुमनमा छलफल गरी मेलमिलाप गर्न खोजे पनि पीडित पक्षले नमानेपछि प्रहरी चौकी, थुमनले मोटरसाइकलमा राखेर कात्तिक ८ गते जिल्ला प्रहरी कार्यालय लैजाने क्रममा स्थानीय दावा तामाङको गुडिरहेको मोटरसाइकलमा बसेका छिरिङले मोटरसाइकल पल्टाई भागेर रोङ्गा भिरबाट तल झरेर रोङ्गा खोलामा हाम फालेर बेपत्ता भएका थिए ।

घाइतेका परिवारले कात्तिक ७ गते प्रहरी चौकी, थुमनमा उजुरी दिएको विषयमा प्रहरी चौकी, थुमन र वडा कार्यालयमा छलफल गरी सहमति हुन नसकेपछि जिल्ला प्रहरी कार्यालय पठाउने क्रममा वडा अध्यक्ष र स्थानीय प्रहरीको मिलेमतोमा बेपत्ता पारिएको भन्ने उजुरीको आधारमा कात्तिक १४ गते गिरफ्तार गरी अनुसन्धान भइरहेको जिल्ला प्रहरी कार्यालयका डिएसपी सुवास बुढाथोकीले बताउनु भयो ।

निर्दोष वडाध्यक्षलाई फसाउने नियतले उजुरी परेको घटनालाई सहजिकरण गर्ने तथा घाइतेको उपचारको लागि समेत सहयोग गरेको वडा अध्यक्ष निर्दोष हुनाले रिहाइको माग गरेको स्थानीय निमा तामाङले बताउनु भयो । उहाँको तत्काल रिहाइका लागि नेकपा (एमाले) ले कात्तिक १८ गते जिल्ला प्रशासन कार्यालयमा ज्ञापन पत्र पेस गरेको छ । एमाले जिल्ला अध्यक्ष कन्न्याल लामाद्वारा हस्ताक्षरित ज्ञापन पत्रमा घटनाको आरोपित र अभियुक्त बनाउन खोजिएकोले तत्काल तीन दिनभित्र रिहाइको माग गरिएको छ ।

जिल्ला समन्वय समितिका प्रमुख अशोककुमार घिमिरे, नेकपा एमाले केन्द्रीय सदस्य प्रेम तामाङ, जिल्ला सचिव जनार्दन ढकाललगायतको उपस्थितीमा उक्त ज्ञापन पत्र जिल्ला प्रशासन कार्यालयका निमित्त प्रमुख जिल्ला अधिकारी लोकेन्द्र ज्ञावली र जिल्ला प्रहरी कार्यालयका डिएसपी सुवास बुढाथोकी समक्ष पेस गरेका हुन् । तीन दिनभित्र माग पुरा नभए चरणबद्ध आन्दोलन गर्ने अध्यक्ष लामाले बताउनु भयो ।

हेमनाथ खतिवडा