गिरफ्तार गरिएका पत्रकार इन्सेकको रोहबरमा हिरासत मुक्त

 

जिल्ला प्रहरी कार्यालय कालिकोटको रेडियोको कार्यकक्षबाट गिरफ्तार गरिएका रास्कोट नपा–२ बस्ने २७ वर्षीय पत्रकार कर्ण विश्वकर्मा चैत १४ गते इन्सेककर्मी र पत्रकारको रोहबरमा हिरासत मुक्त भएका छन् ।

विप्लव नेतृत्वको नेकपा निकट जनपत्रकार सङ्घमा लागि सो पार्टीको प्रचारप्रसार गरेको आरोपमा प्रहरीले विकलाई चैत ७ गते गिरफ्तार गरेको थियो ।

पत्रकार विश्वकर्मालाई प्रहरीले दैनिक तारेखमा हिरासत मुक्त गरेको जिल्ला प्रहरी कार्यालय, कालिकोटले जनाएको छ ।

नेत्रविक्रम चन्द नेतृत्वको नेकपामा आस्था राखेको आरोपमा पत्रकार विश्वकर्मालाई गिरफतार गरेको भए पनि प्रहरीले सार्वजनिक अभद्र व्यवहार सम्बन्धी मुद्दा दर्ता गरेको थियो ।

प्रहरी अनुसन्धानका क्रममा पत्रकार विश्वकर्मा निर्दोष भेटिएकोले उनलाई मानवअधिकारकर्मी तथा पत्रकारको रोहबरमा हिरासत मुक्त गरिएको जिल्ला प्रहरी कार्यालय, कालिकोटका डिएसपी विनोद शर्माले जानकारी दिएका छन् ।


कालीबहादुर मल्ल