समाचारहरू

गाविसहरूमा गाविस सचिव नहुँदा भूकम्प पीडितसँग पुनःनिर्माणको अनुदान सम्झौता गर्न समस्या परेको छ ।

अनुदान सम्झौताको लागि गाउँगाउँमा प्राविधिकहरूको टोली खटिएर गए पनि प्राविधिकहरू भने बेकामे बनेका छन् । भूकम्प पीडितहरूसँग अनुदान सम्झौता गर्न गाविस सचिवलाई जिम्मा दिइएको छ । तर, जिल्लाका ६८ गाविसमध्ये २८ गाविसमा गाविस सचिव नभएपछि अनुदान सम्झौतामा समस्या भएको स्थानीय विकास अधिकारी कृष्णबहादुर शाहीले बताए ।

धेरै गाविसहरूमा सचिव नहुँदा गाविसको दैनिक कामकाज र पुनःनिर्माणको सम्झौता गर्न ढिलाई भएको गाविस सचिव हकहित केन्द्र सिन्धुपाल्चोकका आध्यक्ष दुर्गा ढुङ्गेलले बताए ।

गएको वैशाख १२ गतेदेखि नै अनुदान सम्झौताको प्रक्रिया सुरु गरिएको भएपनि हालसम्म चौतारा र मेलम्ची गरी दुई नगरपालिकामा मात्र सम्झौता गरी पहिलो किस्ता वितरण भएको छ ।

गाविस सचिवको अभावले अन्य गाविसहरूमा समस्या परेको पुनःनिर्माण प्राधिकरण जिल्ला सम्पर्क कार्यालयका प्रमुख भूवनेश्वर लामिछानेले बताए ।

नातिबावु धिताल