समाचारहरू

हुम्ला जिल्लाका श्रीनगर, जैर, मैला, मदना, कालिका, दार्मा, श्रीमष्ठा, मिमि, रोडिकोट, गोठी र साँया गाविसमा सचिव नहुँदा ती गाविसका स्थानीयबासीले नागरिकता लगायतका सेवाबाट वञ्चित भएको गुनासो गरेका छन् ।

नागरिकता बनाउन गाविस सचिवको सिफारिस चाहिने भएपनि गाविस कार्यालयमा असोज १ गतेदेखि गाविस सचिव नहुँदा सर्केघाट इलाका प्रशासन कार्यालयबाट नागरिकता लगायतका सेवा नपाएको स्थानीय वर्षपालले गुनासो गरेका हुन् ।

हाल जिल्ला बाहिर पठनपाठन गर्न गएका व्यक्ति दसैँ तिहारमा घरमा आएको र नागरिकता बनाएर जिल्ला बाहिर जाने योजनामा रहेको भएपनि सचिव नहुँदा नागरिकता बनाउन नसकेको पालले बताए ।

नागरिकता नहुँदा स्थानीयबासीलाई तिब्बतमा जान र व्यापार व्यवसाय गर्नको लागि समस्या भएको स्थानीयबासी सन्तोष सुनारले गुनासो गरे । नागरिकता नहुँदा सामाजिक सुरक्षा भत्ता र सीमा पास लगायतका सरकारी सेवा सुविधाबाट वञ्चित हुनु परेको स्थानीय भरत सिंह बताउँछन् ।

इलाका प्रशासन कार्यालय सर्केघाटमा नागरिकताका लागि प्रतिदिन ४० देखि ५० जनासम्म आउने गरेको भएपनि साँया गाविस लगायत जिल्लाका तल्लो भेगका ११ ओटा गाविसमा सचिव नहुँदा नागरिकता बनाउन नपाएको सिंहले गुनासो गरे ।

प्रमुख जिल्ला अधिकारी डा. कृष्णबहादुर कुवरले गाविस सचिवले सिफारिस गरेको अवस्थामा जिल्लाबाट नागरिकता दिने व्यवस्था मिलाइएको बताए । इलाका प्रशासन कार्यालय सर्केघाटमा कार्यालय स्थापना भएपनि सुरु देखि नै कार्यालय प्रमुखसमेत नहुँदा नागरिकता वितरणमा समस्या भएको प्रजिअ कुवरले जानकारी दिए ।

गाविस सचिवलाई आआफ्नो कार्यालयमा हाजिर हुन तत्काल ताकेता गर्ने स्थानीय विकास अधिकारी बलदेवप्रसाद जोशीले बताए ।

नन्द सिंह