गाउँमा औषधि र स्वास्थ्यकर्मी नभएपछि उपचार तथा मौसमका कारण उद्दार हुन नसक्दा एक महिलाको मृत्यु

  ०७९ असोज २५ गते

पाँच दिनदेखि रक्तश्रावबाट पीडित भएकी सर्केगाड गाउँपालिका-७ रोडिकोटकी २४ वर्षीया पवित्रा छन्त्यालको उपचारमा समस्या भएका कारण मृत्यु भएको उहाँका पति शान्तबहादुर छन्त्यालले गुनासो गर्नु भयो ।

असोज २० गतेदेखि सुत्केरी हुन नसकेर घरमै रहेकी पत्नीको उद्दार गरी जिल्ला बाहिर उपचारका लागि लैजान पहलका लागि शान्तबहादुरले अनुरोध गरेकोमा सुनुवाइ नभएको उहाँको आरोप छ ।

उहाँले सर्केगाड गाउँपालिका रोडिकोट स्वास्थ्यचौकीमा कुनैपनि औषधि र स्रोत साधन नभएपछि जिल्ला बाहिरै लैजानु पर्ने भएपनि सो हुन नसक्दा मृत्यु भएको  आरोप लगाउनु भयो ।

उहाँका अनुसार सरकारले सुत्केरीको उद्दारका लागि राष्ट्रपति महिला उत्थान कार्यक्रमले कुनै सुनुवाइ गरेन ।

प्रमुख जिल्ला अधिकारी सीता परियारले असोज २४ गते दिउँसो मात्रै जानकारी आएको बताउँदै लगत्तै हुम्लाका विभिन्न गाउँपालिकामा अविरल वर्षाले घर भत्कँदा घाइते भएका मानिसहरूलाई उद्दारका लागि गृह मन्त्रालयमा हेलिकप्टरको व्यवस्थाका लागि पहल गरेको बताउनु भयो ।

जिल्लामा अविरल वर्षा नियमित भइरहेकाले हेलिकप्टर उड्न नसकेको प्रतिक्रिया प्रमुख जिल्ला अधिकारी परियारले दिनु भयो ।

 


नन्द सिंह