गाउँपालिका सार्न खोजेको भन्दै गरिएको प्रदर्शनमा झडप हुँदा १२ जना घाइते

चन्द्रनगर गाउँपालिका–७ मा रहेको गाउँपालिका कार्यालय वडा नं. २ स्थित बबरगञ्जमा सार्न खोजेको भन्दै स्थानीय, नेपाली कांग्रेस तथा नेकपाका कार्यकर्ताहरू संयुक्त रुपमा मिली चन्द्रनगर गाउँपाकिलाको कार्यालयमा तालाबन्दी गरी फागुन २१ गते प्रदर्शन गरेपछि प्रहरीले लाठी चार्ज गर्नुका साथै १४ राउण्ड अश्रु ग्याँस प्रहार गर्दा नौ जना घाइते भएको कांग्रेसका पुर्व सभापति सत्यदेव सिंह दनुवारले बताउनु भएको छ ।

तालाबन्दी गरी प्रदर्शन गर्ने क्रममा प्रर्दशनकारी र प्रहरीबिच झडप भएको थियो । झडपमा घाइते हुनेहरूमा नेकपाका कार्यकर्ता चन्द्रनगर गाउँपालिका–७ का ३६ वर्षीय रामकलेबर राय यादव, २८ वर्षीय सकिन्द्र मुखिया, २९ वर्षीय राकेश महतो, ३१ वर्षीय रामसमिन्द्र मुखिया र कांग्रेस कार्यकर्ता चनद्रनगर गाउँपालिका–७ का ३३ वर्षीय नवराजकुमार महतो, ३० वर्षीय रामकलेश सिंह, ३५ वर्षीय विवेक दनुवार, २४ वर्षीय रविन्द्र सहनी, वडा नंं ६ का २८ वर्षीय सत्यनारायण दनुवार घाइते भएका हुन् ।

घाइतेहरूको सामान्य उपचार चन्द्रनगर गाउँपालिकास्थित सामुदयिक स्वास्थ्य क्लिनिकमा गरी जिल्ला अस्पताल मलङ्गवा लगेर थप उपचार गराइएको छ ।

घाइतेमध्ये सत्यनारायण दनुवारलाई थप उपचारका लागि बीरगंज लगेको नेपाली कांग्रेसका पुर्व सभापति सत्यदेव सिंह दनुवारले जानकारी दिनु भएको छ ।

झडपमा सशस्त्र प्रहरी बलका ३२ वर्षीय रामनरेश राय, २९ वर्षीय विनोद महतो, ३४ वर्षीय रामचन्द्र राय यादव सामान्य घाइते भएका छन् ।

घाइतेहरूको उपचार जिल्ला अस्पताल मलङ्गवामा भइरहेको जिल्ला प्रहरी कार्यालयका एसपी सन्तोषसिंह राठौरले जानकारी दिनु भएको छ ।

झडप भइरहेको अवस्थामा भिडलाई नियन्त्रणमा लिन १० सेल तथा सशस्त्र बलले चार सेल अश्रु ग्याँस गरी १४ सेल अश्रु ग्याँस प्रहार गरेको एसपी राठौरले जानकारी दिनु भएको छ । प्रहरीले रबरको गोली चलाएको आरोप झुठा रहेको उहाँले बताउनु भएको छ ।

चन्द्रनगर गाउँपालिकाका अध्यक्ष महेन्द्र महतोले गाउँपालिका सार्ने पटक–पटक सोच बनाएको र गाउँपालिकामा कार्यरत कर्मचारीहरूले कार्यालयमा रहेको कागज पत्रहरु तथा मेशनरी सामान सारेको हुँदा कार्यालयमा तालाबन्दी गरी विरोध प्रदर्शन गरेको वडा नं. ६ का स्थानीय चेतनारायण मुखियाले बताउनु भएको छ ।


बुधन साह