समाचारहरू

इन्सेक अनलाइनसहित स्थानीय सञ्चार माध्यमहरूमा समाचार प्रकाशन भएपछि अभिभावकको मृत्यु पश्चात् सहाराविहीन बगनासकाली गाउँपालिका-७ खानीगाउँका दुई बोटे बालबालिकाको सहयोगका लागि सहयोगी हातहरू अगाडि बढेका छन् ।

१४ वर्षीया हेमा बोटे र उनका १० वर्षीय भाइ सन्तबीर (बुद्ध) बोटेले कष्टकर रूपमा दैनिकी गुजार्दै आएको इन्सेक जिल्ला प्रतिनिधिले जानकारी पाएपछि सोसम्बन्धी समाचार कात्तिक २६ गते इन्सेक अनलाइनमा प्रकाशन भएको थियो ।

समाचार प्रकाशन भएपछि कात्तिक २७ गते बगनासकाली गाउँपालिकाका अध्यक्ष कृष्णप्रसाद बस्याल स्वयम् बालबालिकाको घरमा पुगी उनीहरूको बारेमा जानकारी लिए । सोही समयमा अध्यक्ष बस्याल र समाजसेवी युवा कमलकृष्ण कार्कीले १० हजार रुपियाँ बराबरको चामल, लुगा तथा बिस्तारा र ब्ल्याङ्केट बालबालिकालाई प्रदान गरे । त्यस्तै बगनासकाली गाउँपालिका-७ की वडा सदस्य रिता भट्टराईले दुई/दुई जोर न्यानो कपडा प्रदान गरिन् ।

गाउँपालिका अध्यक्ष बस्यालले तत्कालका लागि यसरी सहयोग प्रदान गरिएपनि दीर्घकालका लागि उनीहरूलाई पुनर्स्थापना केन्द्रमा पठाउन उपयुक्त हुने र त्यसका लागि गाउँपालिकाले आवश्यक पहल गर्ने बताए । अहिले उनीहरूको घरमा बस्न समेत अप्ठेरो भएकोले अन्य बिकल्प नहुञ्जेल सम्मका लागि छिमेकी शान्ति बोटेको घरमा राखेर खाना खुवाउने गरी वातावरण मिलाइएको छ ।

बालबालिका दुवैको जन्मदर्ता तथा हेमाको अपाङ्गता परिचय पत्र पनि नभएकोले तत्काल सो कामलाई अगाडि बढाउने वडा सचिव हरिप्रसाद बस्यालले बताए । हेमा शारीरिक रूपले अपाङ्ग छिन् भने सन्तवीरमा कुनै समस्या छैन ।

यज्ञमूर्ति तिमिल्सिना