समाचारहरू

नेत्रविक्रम चन्द (विप्लव) नेतृत्वको नेपाल कम्युनिष्ट पार्टीका कार्यकर्ताले मष्टा गाउँपालिकाका-२ का ४० वर्षीय सोही गाउँपालिका अध्यक्ष कर्णबहादुर कठायतलाई असार १५ गते मोसो दलेर दुर्व्यवहार गरेका छन् । उनलाई गाउँपालिका कार्यालय परिसर नजिकै मोसो दलेर दुर्व्यवहार गरिएको हो ।

गाउँपालिका कार्यालयबाट बैठक सकेर बाहिर निस्कदै गर्दा सो पार्टीका कार्यकर्ताहरूले एक छिन तपाईसँग काम छ भन्दै बोलाएर अलि पर लगेको र 'भष्ट्राचारी अध्यक्ष' भन्दै मोसो दलेको प्रत्यक्षदर्शीले बताएका छन ।

मोसो दलिसकेपछि कार्यालय परिसरमा रहेका शिक्षक, वडा अध्यक्षलगायत अन्य सेवाग्राहीहरू र सो पार्टीका कार्यकर्ताबिच केही बेर झडप भएको गाउँपालिका उपाध्यक्ष भगवती बोहराले जानकारी दिइन् ।

८/१० जनाको समूहमा रहेका सो पार्टीका कार्यकर्ताले अध्यक्षलाई झुक्याएर मोसो दलेको बोहराको भनाई छ ।

अध्यक्ष कठायतले योजनाको रकमवाट कमिसन खाने गरेको, आफन्त र कार्यकर्तालाई योजना दिएको र विभिन्न कार्यक्रममा भष्ट्राचार गरेको आरोप लगाउँदै जनकारबाही गरिएको सो पार्टीले जनाएको छ ।

गाउँपालिका अध्यक्षमाथि दुर्व्यवहार गरिएको खबर प्राप्त हुने बित्तिकै मष्टातिर प्रहरी परिचालन गरी आरोपितहरूको खोजी सुरू गरिएको सहायक प्रमुख जिल्ला अधिकारी टेक सिंह कुँवरले जानकारी दिनु भयो ।

रमेश केसी