समाचारहरू

निसीखोला गाउँपालिका– १ किटेनीका विरबहादुर विक फागुन २५ गते चेकजाँचको लागि वुर्तिवाङ प्राथमिक स्वास्थ्य केन्द्र पुग्नुभयो । गाउँपालिकाले फागुन महिनाबाट लागु हुन्छ भनेर दिएको स्वास्थ्य विमा परिचय पत्र साथमै बोकेर गएका विकलाई स्वास्थ्य केन्द्रले बीमा योजना लागु नभएको भन्दै पूर्ण शुल्क तिरे मात्र उपचार हुने बतायो । उहाँले उपचारको क्रममा लागेको सम्पूर्ण रकम तिरेर घर फर्कनुभयो ।

उहाँ मात्र होइन यतिबेला निसीखोला गाउँपालिकाले फागुन महिनाबाट लागु हुने गरी बीमा गरेका १ हजार ८ सय ३८ जना सुविधाबाट वञ्चित भएका छन् । गाउँपालिकाले बीमा गरिदिए पनि बीमा रकम समयमै भुक्तानी नगरेको कारण उनिहरू सेवा लिनबाट वञ्चित भएका हुन् ।

गत असारमा सम्पन्न दशौं गाउँसभाले गाउँपालिकाका सम्पूर्ण नागरिकको निशुल्क स्वास्थ्य बीमा गर्ने घोषणा गरेको थियो । सोही अनुसार गाउँपालिकाले ५ हजार ४ सय घरधुरीका लागि राजश्व बाडफाँडबाट २ करोड रुपैयाँ विनियोजन गरेको थियो ।

पहिलो चरणमा ९ हजार १ सय ८५ जनाको स्वास्थ्य बीमा गर्ने गरी विवरण संकलन गरिएको थियो । जसमध्येबाट गाउँपालिकाले फागुन महिनाबाट लागु हुने गरी १ हजार ८ सय ३८ जनाको बीमा गरेको थियो ।  तर, गाउँपालिकाले हालसम्म पहिलो चरणको ६४ लाख रुपियाँ बीमा रकम भुक्तानी गर्न नसक्दा बीमा गरेका नागरिक पनि सुविधा लिनबाट वञ्चित भएका हुन् ।

सङ्घ, प्रदेश र पालिकाको आन्तरिक स्रोतको राजस्व बाँडफाँडबाट नागरिकको बीमा गर्ने निर्णय गरेपनि संघ र प्रदेशबाट समयमै बजेट नआउँदा बीमा रकम भुक्तानी गर्न नसकिएको गाउँपालिकाका सूचना अधिकारी पुरुषोत्तम गौतमले बताउनुभयो ।

गाउँपालिकाले असोज, कात्तिक र मङ्सिरमा रकम भुक्तानी गरिदिएको भए फागुन १ गतेदेखि नागरिकले बीमाको सेवा लिन पाउने थिए ।

संघीय सरकारबाट केही दिन पहिले मात्र ५५ लाख रुपियाँ प्राप्त भएको एक हप्तामा १ करोड रुपियाँ भुक्तानी गर्ने तयारी गरिरकेको गाउँपालिकाका निमित्त प्रशासकीय अधिकृत दिलिप कुमार चन्दले बताउनुभयो ।

सिर्जना पन्त