समाचारहरू

चंखेली गाउँपालिकाले पाठ्यपुस्तक बुझ्न नमानेपछि विद्यार्थीको पठनपाठन प्रभावित भएको छ । गाउँपालिका नजिक रहेको सलिसल्लामा जिल्ला बाहिरबाट गत चैत २७ गते नै पुगिसकेपनि गाउँपालिकाका जनप्रतिनिधिको लापरवाहीका कारण विद्यार्थीको पठनपाठनमा समस्या भएको चंखेली गाउँपालिकाका स्थानीय जसबहादुर तामाङले बताउनु भएको छ ।

एक महिना अगाडि नै पुस्तक ढुवानीकर्ताले गाउँपालिकाकै सलीसल्लाको गोदामसम्म पुस्तक पुर्‍याएको भएपनि गाउँपालिकाले पाठ्यपुस्तक नबुझेपछि पाठ्यपुस्तक सलीसल्लामै थन्किएको तामाङले बताउनु भएको छ ।

गाउँपालिकाको  लापरवाहीका कारण चंखेली गाउँपालिका भित्रका २६ ओटा विद्यालयमा १ हजार ९ सय ८० जना विद्यार्थीले पाठ्यपुस्तक पाउनबाट वञ्चित भएका छन ।  २०८० शैक्षिक सत्र सुरू भएकाे एक महिना वित्न लाग्दा समेत सलिसल्लामा पुुगेका पाठ्यपुस्तक गाउँपालिकाले नबुझेपछि विद्यार्थीहरूको हातमा अझै पाठ्यपुस्तक पुग्न नसकेको हो ।

चंखली गाउँपालिका अध्यक्ष प्यारीलाल शाहीले चंखेली गाउँपालिका र सर्केगाड गाउँपालिका बिचमा रहेको बजार क्षेत्रको सलिसल्लामा गएर पुस्तक नबुझ्ने प्रतिक्रिया दिनु भएको छ ।

वर्षौँदेखि पाठ्यपुस्तक ढुवानी गर्दै आएका ज्ञानुबुक एण्ड स्टेशनरी पसलका प्रोप्राइटर मानदेव शाहीले  गाउँपालिकाे केन्द्र पिप्लाङमै ल्याएर बुझाउँछु भन्दा पनि गाउँपालिका अध्यक्ष शाहीले मतलब नगर्दा पाठ्यपुस्तक सलिसल्लामै थन्किएको आरोप लगाउनु भएको छ ।

नन्द सिंह