समाचारहरू

आमाछोदिङमो गाउँपालिकाले ६५ वर्षदेखि ७० वर्षसम्मका ज्येष्ठ नागरिक, एकल महिला र ‘क’ वर्गको अपाङ्गता भएका व्यक्तिलाई निःशुल्क स्वास्थ्य बिमा गरिदिने भनेर फाराम भराए पनि बिमा बापतको रकम गाउँपालिकाले नदिएपछि उनीहरू स्वास्थ्य बिमा सेवाबाट वञ्चित भएका छन् ।

यस वर्ष स्वास्थ्य बिमाको सुविधाबाट वञ्चित हुन परेकोले यहाँका ७ सय भन्दा बढी ज्येष्ठ नागरिक प्रभावित भएको स्थानीय च्याङ्बा घलेले बताउनु भयो ।

आमाछोदिङमो गाउँपालिकाले बजेटको व्यवस्था नगरिदिँदा गाउँपालिकाभित्रका धेरै नागरिकहरू यस वर्ष स्वास्थ्य बिमाको सेवाबाट वञ्चित भएका हुन् ।

आमाछोदिङमो गाउँपालिकामा ज्येष्ठ नागरिक १ सय ६० जना, सामान्य परिवारमा १० परिवारको मात्र बिमा गरिएको छ । गाउँपालिका भरी यस वर्ष जम्मा २ सय १० जनाको मात्र बिमा भएको छ ।

महिला स्वास्थ्य स्वयमसेवीका तथा अपाङ्गता भएकाहरूको समेत बिमा नगरेको स्थानीय फुर्पु तामाङले जानकारी दिनुभयो ।

पाँच जना बिमा दर्ता सहयोगीले दश प्रतिशत मात्र सुविधा पाउने भएकोले दुर्गममा खर्च नपुग्ने भन्दै काम नगरेको र अब गाउँमा स्वास्थ्य स्वयमसेवीहरू समेत परिचालन गरेर गाउँपालिले अभिमुखिकरण गर्न यस वर्ष गाउँपालिकाले बजेट छुट्ट्याएको आमाछोदिङमो गाउँपालिका स्वास्थ्य शाखा प्रमुख निमा तामाङले बताउनु भयो ।

गत वर्ष स्वास्थ्य बिमा गर्न नसके पनि यस वर्ष र आगामी वर्ष स्वास्थ्य बिमाबारे सचेतनाका लागि २ लाख रुपियाँ छुट्याएको प्रमुख तामाङले जानकारी दिनुभयो ।

हेमनाथ खतिवडा