समाचारहरू

तारकेश्वर गाउँपालिकाले समयमा औषधि खरिद नगर्दा गाउँपालिकाभरका पाँच ओटा स्वास्थ्य संस्थामा औषधि अभाव भएको छ ।

सरकारले स्वास्थ्य संस्थामा निःशुल्क औषधि वितरण गर्ने प्रावधान भएपनि गाउँपालिकाले समयमा औषधि खरिद नगर्दा औषधि अभाव भएको तारकेश्वरगाउँपालिका–४, नेवारपानीका बुधसिङ स्वाथ्य चौकीमा इञ्चार्ज मिश्रीलाल यादवले बताए ।

‘आँखाको ड्रप, कानको ड्रप, बेटाडिन, एमोम्सिलिनलगायत केही एन्टिबाइटिक औषधि र मलमहरू सकिएको छ ।’–उनले भने–‘गाउँपालिकाले औषधि नै खरिद नगरेकोले स्वास्थ्य संस्थामा औषधि अभाव भएको हो ।’

गाउँपालिकामा रहेको सबै पाँच ओटै स्वास्थ्य संस्थामा अहिले केही अत्यावश्यक औषधिहरू सकिएको गाउँपालिकाको स्वास्थ्य शाखा प्रमुख राजु केसीले बताए ।

गाउँपालिकाको प्रमुख प्रशासकीय अधिकृत सरुवा भए पनि अर्को व्यक्ति नआएकोले औषधि खरिदको प्रक्रिया नै अघि बढाउन नपाएकोले औषधि अभाव भएको स्वास्थ्य शाखा प्रमुख केसीले बताए ।

तारकेश्वर–१ दाङसिङस्थित दाङसिङ स्वास्थ्य चौकीमा आँखामा राख्ने ड्रप समेत नपाएको तारकेश्वर गाउँपालिकाकै कर्मचारी विष्णु बजगाईले बताए ।

गाउँपालिकामा प्रमुख प्रशासकीय अधिकृत दुई महिनाअघि सरुवा भएर अन्यत्र गएपछि अर्को प्रमुख प्रशासकीय अधिकृत अझै गाउँपालिकामा हाजिर हुन आएका छैनन् ।

आउँदो हप्तासम्म प्रमुख प्रशासकीय अधिकृत आउने जानकारी आएको स्वास्थ्य शाखा प्रमुख केसीले बताए । उनले भने–‘हाकिम आउनासाथ एउटा निर्णय गराएर औषधि खरिद गरी तत्काल वितरण गरिनेछ ।’

तारकेश्वर गाउँपालिकाले यो वर्ष स्वास्थ्य चौकीमा निःशुल्क औषधि वितरणको लागि २० लाख रुपियाँ बजेट विनियोजन गरेको छ ।

नवदीप श्रेष्ठ