समाचारहरू

बाँफीकोट गाउँपालिका कार्यालयमा कार्यरत २८ वर्षीय इन्जिनियर दिपक शाहलाई ०७९ साउन ४ गते नेपाली काङ्ग्रेस निकट तरुण दल बाँफीकोटका अध्यक्ष ३३ वर्षीय राजु शाहले कार्यकक्षमा कुटपिट गरेको पीडितले आरोप लगाउनु भएको छ ।

कुटपिटको घटनामा संलग्न भएको आरोपमा शाहलाई प्रहरीले सोहीदिन गिरफ्तार गरेको छ ।

आरोपित राजुले मोरावाङ–दोमाई सडकको काममा आफू अनुकूल काम नगरेको भन्दै गाउँपालिका भित्रै कुटपिट गरेको इन्जिनियर दिपकले जानकारी दिनु भएको छ ।

इन्जिनियर दिपक आफ्नो कार्यकक्षमा काम गरिरहेको अवस्थामा तरुण दलका कार्यकर्ता शाह कार्यकक्षमा पुगेर आफुले भने अनुसार काम किन नगरेको भन्दै कुटपिट गरेको पीडितको भनाई छ ।

इन्जिनियर दिपक शाहलाई तरुण दलका अध्यक्षले कुटपिट गरेपछि गाउँपालिकामा कार्यरत कर्मचारीले आफूहरूले काम गर्दा गर्दै पनि अराजक व्यक्तिबाट कुटिन परेकाले कर्मचारीको सुरक्षाको माग गर्दै दोषीलाई कारवाहीको मागगर्दै ४ गते विज्ञप्ति प्रकाशित गरेका छन् ।

आरोपित राजुलाई प्रहरीले गिरफ्तार गरि अनुसन्धान सुरु गरेको जिल्ला प्रहरी कार्यालय, रुकुम पश्चिमका डीएसपी बिष्णु सोतीले जानकारी दिनुभएको छ । आरोपितलाई इलाका प्रहरी कार्यालय, बाँफीकोटमा नै राखिएको उहाँको भनाई छ ।

घटनाको विरोध गर्दै कर्मचारीले साउन ५ गते गाउँपालिकाबाट हुने कार्यालयका सबै काम बन्द गरेका छन ।

पीडितले हालसम्म कहीँ उजुरी दिएका छैनन । सामान्य घाइते भएका पीडितको उपचार बाँफीकोट स्वास्थ्य चौकीमा भएको थियो ।

मनिषा केसी