समाचारहरू

सिमकोट गाउँपालिका–८ स्थित खोल्सी गाउँका १७ जना गर्भवती महिलाहरू सरकारले दिने सुत्केरी पोषण भत्ता पाउनबाट बञ्चित भएका छन् ।

स्वास्थ्य संस्थामा आठ पटकसम्म गर्भ जाँच गराउनका लागि डेढ घण्टाको पैदल हिडेर सोही वडाको स्याँडा स्वास्थ्यचौकीमा जाने तर सुत्केरी गराउन नआउने भएपछि गर्भ जाँच र प्रसुती गृहमै सुत्केरी भए बापतको उपलव्ध हुने सुत्केरी पोषण भत्ता वा यातायात खर्च गरी तीन हजार रुपियाँ पाउनबाट बञ्चित भएको खोल्सी आधारभूत स्वास्थ्य ईकाइका अहेव धिरेन शाहीले बताउनु भएको छ । स्वास्थ्य संस्थामै सुत्केरी नभएकै कारण उक्त भत्ता उपलव्ध नगर्ने कानुनी प्रावधान भएकै कारण सो रकम उपलव्ध नभएको अहेव शाहीले बताउनु भयो ।

गत आर्थिक वर्षमा उक्त गाउँमा १७ जना गर्भवती महिला थिए । तर ति सबै जना गाउँकै गोठमा सुत्केरी गराइयो । उनीहरु मध्ये एक जना जटिल अवस्था भएपछि जिल्लामा उद्धार गर्नुपरेको थियो । तर शिशुको भने बिचबाटोमै मृत्यु भएको र आमाको भने ज्यान बच्न सफल भएको अहेव शाहीको भनाइ छ ।

गाउँबाट डेढ घण्टा टाढा रहेको स्याँडा स्वास्थ्य चौकी र आधा घण्टा टाढाको चौगानफया आधारभूत स्वास्थ्य केन्द्रमा जान खोजे पनि परिवार र गाउँलेले सहयोग नगरेका कारण सबै गर्भवती महिला गाउँमै सुत्केरी हुन बाध्यता रहेको सोही ठाँउकी स्थानीय पविता शाहीको गुनासो गर्नु भयो । गाउँबासीमा सुरक्षित सुत्केरी गराउने कुरामा जानकारी पाएर पनि त्यसलाई अभिभावकले अटेरी गरेका कारण महिलाहरूले गोठ गोठमा सुत्केरी हुनु परेको स्थानीय महिला दुर्गा शाहीले पीडा सुनाउनु भयो ।

सिङ्गो खोल्सीगाउँका गर्भवती महिलाहरू घरकै गोठ गोठमा सुत्केरी हुने गरेको सिमकोट गाउँपालिका–८ का वडा अध्यक्ष कमल बुढाले बताउनु भयो । उहाँले यसरी गोठमै सुत्केरी गराउने कार्य राम्रो नभएको कुरा सम्झाउने प्रयास गर्दा पनि अभिभावकले नमानेपछि गाउँका गोठमै सुकेरी हुन बाध्य भएको जानकारी दिनु भयो ।

गोठमै गर्भवतीलाई सुत्केरी गराउँदा सुरक्षित नहुने र सम्भावित खतरा बारे जानकारी गराउँदा पनि गाउँवासीले नमान्ने गरेको अध्यक्ष बुढाको भनाइ छ ।

सिमकोट गाउँपालिका स्वास्थ्य शाखा संयोजक नर भण्डारीले यो समस्या खोल्सी गाउँको लागि जल्दो बल्दो रहेको र केही समय अगाडि आफू गएर सहजीकरण गर्न खोज्दा अभिभावकले नमानेको आरोप लगाउनु भयो  ।

नन्द सिंह